Auleria Wakudumo
Opolifi moshitukulwa shaShikoto oya tula moipandeko omulumenhu weedula 44 molwaashi ta fekelwa a twa nombele nokudipaya omumwainamati weedula 46.
Oshiningwanima eshi osha ningilwa komukunda Onkumbula mOshikoto, sha ningwa keengulasha okupendukila Etinhe.
Nakufya okwa tongololwa oye Ngendati Paulus.
Omukulunhu wopolifi moshitukulwa shaShikoto, Commissioner Teopolina Kalompo-Nashikaku okwa koleka oshiningwanima eshi.
Otaku hokololwa omufekelwa a twa mumwaina nombele sha dja eshi vali tava tanguna.
“Konima yokutanguna, Paulus okwa ya konduda yamumwaina. Mokuya monduda, mumwainamati okwemu twa nombele,” Nashikaku ta ti.
Opolifi oya holola kutya Paulus okwa xulifila poshiningwanima.
Otaku hokololwa ovalumenhu ava ovamwainafana hava di meumbo limwe novakulunhu vavo.
Oshiningwanima shikwao, otaku hokololwa opolifi moshitukulwa shaKavango East ya tula oumati vavali veedula 17 oshoyo 18 moipandeko eshi tava fekelwa edipao lamukwao weedula 17.
Opolifi oya holola kutya oumati ava vavali ova twa mukwao nombele molwa ongodi yaye yopeke.
Nakufya okwa tongololwa oye Paulus Kahili.
Otaku hokololwa olutu laKahili leli tuwa momwiidi mepandaanda laJohn Mutorwa, popepi nomahooli oPuma moRundu.
Ovafekelwa aveshe vati oveli ovakalimo vomolukanda laSauyemwa.
Otava fekelwa va dipaya Kahili efimbo lomutenya ndele tavemu kufa ongodi yaye ina ongushu yoshimaliwa shi fike peeN$2 500 ndele tava faduka po.
Opolifi oya holola kutya ombele oyo ya longifwa okudipaya Kahili oya monika oshoyo ongodi yaye nopolifi otai twikile okuninga omakonakono.
-wakudumoauleria@gmail.com