Omulumenhu weedula 33 okwa fya eshi a lyatwa kotuwa Osoondaxa lwopotundi 08h45 mopate yOngha nOnamutai moshitukulwa shaShana.
Nakufya okwa tongolwa oye Moses Hendrick Nghidiputate a dile komukunda Ondjabaayalala.
Omupopiliko wopolifi moshitukulwa shaShana Warrant Frieda Shikole okwa hokolola ta ti omulumenhu okwa li va fikama pomukunghulo wopate naina tava kongo eelefa efimbo longula.
Okwa ti Nghidiputate ou ta hokololwa kutya oku na oudu wopamadilaadilo okwe linyeka meenyala daina ndele ta lotokele mopate pefimbo kwa li taku di oshiyendifo.
Eshi osha eta opo a lyatwe noku monifwa oshiponga neenghono kotuwa yoToyata Hilux oyo yali tai piti po. Konima okwa twalwa koshipangelo shaShakati oko a ka xulifila omutenya wefiku olo.
Opolifi oya kunghilila ovakwashiwana opo va kale tava tonatela nawa ovanhu ve na oudu wopamadilaadilo ngeenge ve li popepi neepate.
Fillemon Shihwandu Papaleni weedula 22 naye okwa xulifa eshi a lyatwa keshina lokolutenda Olomakaya mokati koufiku lwopotundi 00h30 momukunda Onankali oo uli pokati kOshivelo nOndangwa.
Opolifi oya hokolola ta i ti nakufya okwa li a nangala mopate eli koshi yodungo yomaladu nokwa xulifila ponhele opo.
Ovakwapata voonakufya aveshe ova shivifilwa nomakonakono opolifi otaa twikile.
– fhamalwa@nepc.com.na