Omulongisikola gomusamane gomimvo 53 okwa kanitha oshimaliwa shithike poN$93,220 sho a hekwa komufuthi a gandje uuyelele womayalulo ge gombaanga.
Omulongi ngoka anuwa okwa dhengelwa ongodhi komuntu ta ti oha longo kehangano lyoMTC, nokwa sindana oshimaliwa shoN$8000, okwa pumbwa oku gandja uuyelele womayalulilo ge gokombaanga.
Omukuluntu gwopolisi moshitopolwa shaShana Naftal Lungameni Sakaria okwa ti oshiningwanima shoka osha holoka nale kashona, ihe osha lopotwa ashike Etitano lya zi ko.
Otaku hokololwa kutya omulongisikola ngoka anuwa okwali a yamukula onomola yaamo mongondhi ye, ya dhengwa anuwa komunambelewa Timoteus Andreas ta dhenge okuza koombelewa oonene dhehangano lyoMTC koWindhoek, te mu lombwele kutya okwa sindana oshimaliwa N$8 600.
“Omudhengi ngoka okwali a pula uyelele awihe wombaanga opo anuwa a vule okutuma oshimaliwa shoka komusamane a sindana. Uuyelele mboka a gandja ethimbo olyo tuu ndyoka’’Sakaria ta hokololola ngaaka.
Omanga anuwa a tegelela oshimaliwa shi lopote, okwa mono okatumwalaka kongondhi ye taka lopota kutya kombaanga ye okwa nanwa oshimaliwa N$93, 800.
Ta ti, konima yokathimbo natango okwa lopotelwa kwa nanwa N$980 na hugunina taku nanwa N$740.
Sakaria okwa ti sha ikwatelela komakonakono gopetameko oshimaliwa shoka oshali sha tuminwa ko accounda yoBank Windhoek okupitila konomola, no nomola ndyoka otayi landulwa kaakonaakoni.
“Iimaliwa mbyoka ya nanwa ko hugunina, oya li ya kuthilwa ko mOshakati,” Sakaria ta ti ngaaka.
Ta kumagidha oshigwana kutya nashi hulithe po okugandja uuyelele woombanga dhawo moongondhi.
“Ningeni ha mu thiki poombelewa mpoka tolombwelwa mongondhi, e to pula uuyelele, shi vulithe okugandja uuyelele weni kaantu kaa mu ya shi,” ta kumagidha ngaaka.
Omunambelewapithi omukuluntu gwomauyelele John Ekongo okwa ti, MTC iha gandja oshimaliwa.
“Oshigwana na shi patuluke etashi hulitha po okukengelelwa kaafuthi,” ta popi ngaaka.
Ta ti, uuna wadhengelwa ongodhi kaanambelewa yoMTC, dhima ongondhi yo ye, e to dhengulula konomola yomayakulo wu pule uuyelele mboka.
Natango omukiintu gumwe okwa yugwa oshimaliwa N$240 000 koBrakwater Eitano.
Sha ikolelela kiiningwanima ya holoka mehuulilo shiwike omukiintu ngoka anuwa okwali a yugwa oshimaliwa shoka komulungo gondjembo omutenya gwaankala.
Kapena ngoka a mangwa po shina sha noshiningwanima shoka, nomakonaakono gopolisi ogeli metifa.
vkaapanda@nepc.com.na