Leevi Kongola Nuuyoma weedula 54 okwa anyenwa omhito yoku li futila mo modolongo eshi vati a vaka po oikombo yomukulupe womushiinda ndele tei twala kohambo yaye.

Okwa holoka momhangu yaUtapi onghela lwoshikando shotete. Oshibofa shaye undulilwa komafiku 10 Juli 2025 nelalakano lokuninga omakonakono omoule.

Oikombo oi li itano noi li pongushu yoN$5400-00.

Otaku hokololwa kutya momafiku 8 omwedi ou momukunda Ongwali moshikandjohoololo shaNesi, moshitukulwa shaMusati Nuuyoma okwa londeka po oikombo motuwa ndele tai twalwa kohambo yaye.

Omukulunhu koshikondo shokukonakona oimbuluma moshitukulwa shaMusati, omupedu Commissioner Zachariah Amakali okwa hokolola ta ti oikombo oya ye mepya lomutamanekwa ou po opo a monena omhito yoku ikwata noku i twala kohambo yaye ina pula omukulupe epitikilo.

Umwe womuneumbo okwa mona oikombo eshi tai londekwa motuwa ndele ta lopotele opolifi.

Opolifi oya kumaida oshiwana opo shi xulife po okushinga po oimuna yovanhu pehe na epitikilo loovene vayo molwashi otashi eta omunhu a kwatwe po.

-fhamalwa@nepc.com.na