ONGWEDIVA-Omupevi pilimaminista goshilongo Natangwe Ithete okwa ithana aanangeshefa konooli opo ya shangithe oongeshefa dhawo.
Ithete okwa kunkilile aanangeshefa ngaaka esiku ya egulula pambelewa ombelewa yoBusiness and Intellectual Property Authority (BIPA) mOngwediva moshitopolwa shaShana Olyomakaya.
Pethimbo ndyoka okwa pula noku indila ooyene yoongeshefa ya nyolithe noku shangitha oongeshefa dhawo, ya kale yena ashihe shoka tashi ulike uumwene wongeshe womuntu.
“Ongeshefa konooli oya ndhindhilikwa tayi ende nawa, yina oongeshefa dha tpita 29 000 dhiishangitha, omanga oshitopolwa shaShana osho shili komeho noongeshefa dhathika 14 000 dhiishangitha,” ta popi ngaaka.
Ithete okwa totha mo wo kutya oombelewa dhoka dha patuluka, otadhi ka yambindhindha oyendji noku ya konda omagulo oshoka omayakulo ogendji oga etwa po pepi.
Ta gwedha ko ta ti, shoka otashi ka yambindhindha wo momikalo dha yooloka oshowo mekoko lyeliko konooli.
“Otwa ndhindhilike kutya oongeshefa dhimwe natango otadhi longo shaali pamilandu dha tulwa po, ihe shoka ka shina uupyakandhi unene. Otuuviteko uuntu momuntu, ashike otwa hala wo tu mu yambindhindhe oku kutha onkatu ya landula ko, omolwa omauwanawa geli komeho,” ta kumagidha ngaaka.
Okwa fatulula kutya okushangitha ongeshefa ohaku yambindhindha wo omunangeshefa poompito mpoka taka kala a hala okumona omayakulo ngaashi okumona omikuli oshowo okumona ootendela okuza kepangelo oshowo komandiki omanene.
Ithete okwa ti BIPA oteya po wo nomukalo gokuishangitha okupitila komalungula.
“Shoka otashi ka kwathela oyendji, oshoka otaya vulu okushiningila kehe mpoka yeli yaana okuthika koombelewa,” ta fatulula ngaaka.
Omunashipundi goBIPA Immanuel !Hanabeb okwa ti, elalakano okugandja omayakulo ga pumbiwa kookasitoma dhawo.
“Ombelewa ndjika oya patulilwa owina okuyambindhindha ayehe yeli konooli opo ya vule okupewa omayakulo agehe taya pula, ihe haku tegelela okuza koombelewa onene,” ta fatulula ngaaka.
!Hanabeb ta gwedha po kutya inaya patulula ashike ombelewa ndjoka konooli okufuula ihe okugwanitha po shoka ya nunininwa oshowo okugandja omayakulo agehe haga gandjwa koombelewa onene.
Ta ti, ombelewa ndjika ontiyali tayi gandja omayakulo agehe, sho ya patulula yimwe ishewe koWalvis Bay.
!Hanabeb okwa ti oombelewa dhoka otadhi odha patulikila kehe omungeshefa.