OSHAKATI- Omukainhu weedula 27 okwa tambulilwa moshipangelo shaShakati konima eshi a tuwa neembele lwoikando ya yooloka ndele ta kwatwa onghonga. 

Oshiningwanima osha ningwa Etivali komukunda Omalyata moshitukulwa shaHangwena efimbo loufiku meumbo lavo. 

Opolifi oya koleka oshingwanima eshi ashike fiyo opapa omufekelwa ina kwatwa po molwashi ke shivike kunakuninga oshihakanwa. 

Pefimbo e li moshipangelo meembete, nakuninga oshihakanwa okwa hokolola ta ti okwa hangika a nangala monduda yaye ndele omufekelwa tateya po ekumba lomuvelo noku ya meni londuda. 

“Onda uda ashike omunhu ta konghola ta ti nandi patulule po nokonima onda ka mona eshi omunhu e li monduda e kwete ombele a djala evuuvuu komutwe fiyo moshipala,” ta ti. 

Okwa hokolola ta ti meumbo okwa hangika mo nomukulupe ou e li omuyambididwa shaashi ota vele oshidu shombada. 

Nakuninga oshihakanwa okwa ti oku li omunailonga weumbo omo a tonatele omukulupe womulumenhu. 

“Onda tameka oilonga ketameko lomwedi ou. Ondi mupe momukunda omo, ame kandi shiimo ovanhu,” ta ti. 

Okwa hokolola ta ti omufekelwa okwe mu pula oimaliwa nongodi yaye yopeke. 

“Okwa ti ngeenge ina ndi mu pa oimaliwa otadi payange,”ta ti. 

Okwa ti omufekelwa okwa kufa ombele a hala okumutwa ashike omukainhu ou okwa kelela ombelele ndele tai mu tu kondjala yokolumosho. 

“Otwa kala hatu kondjo naye ye ta kondjifange okukwatange onghonga. Onda li kuuwa ashike tatekulu ou hadi naye ke udite nge,” ta ti. 

Nakuninga oshihakanwa okwa ti okwe shipondola okudja mo monduda ndele omufekelwa te mu landulile pondje a hala okumudipaa. 

“Okwa tutumbila nge monduda ndele ta kwata nge onghonga lwoikando ihapu,” ta ti. 

Omukainhu ou okwa hokolola ta ti konima eshi a kwatwa onghonga omufekelwa okwe mu lombwela opo e mu lafe koulumenhu waye. 

“Ka kwa li nda hala okulafa. Otwa tameka okukondja natango ndele ta tunge nombele monhulo,” ta ti. 

Okwa ti okudja opo natango omulumenhu okwe mu pula vaye naye moixulo lwoshikando oshitivali. 

“Otwa tameka okukondja ndele handi mu nane koulumenhu waye fiyo ta e fange,” ta hokolola. 

Okwa ti okwe shipondola okupitila mekende londuda ashike omulumenhu okwe mu landulila pondje ndele te mu tu nombele mokuulu lwoshikando oshitivali. 

“Okwa faduka po. Ita ndi dimbuluka kutya olyelye,” ta ti. 

Okwa ti okwa ya poushiinda ta kwena nohonde tai kunguluka ndele ovashiinda tava penduka noku mu twala koshipangelo. 

“Onda mona oixuna onghuloshi oyo. Ka kwa li shipu okupitila mekende shaashi okwa li handi di ohonde keenyala nomonhulo,”ta ti. 

Okwa ti omulumenhu ou okwe ya a tema okatoshe kongodi ashike ka kwa li e mu wete koshipala. 

“Ongodi yange oya hangika ya ndima shaashi emanya okwa li la pwa,” ta ti. 

Nakuninga oshihakanwa okwa ti ovalumenhu kave na onghenda molwashi okwa monifwa oshiponga ndele ta kwatwa vali onghonga. 

Ovapangi koshipangelo ova ti nakuninga oshihakanwa okwa ningilwa omakonakono opaunamiti noshoyo okupewa omayakulo exungomwenyo. 

Omupedu Komufala wopolifi Melanie Mburu okwa ti omakonakono otaa twikile nopolifi oye li pyakidila okukonga ouyelele kombinga yomufekelwa ou. 

Okwa pula kwau eshi omulumenhu ou opo a kale a lopotela opolifi keshe i li popepi. 

Oshiningwanima shikwao shekwatonghonga, omukainhu 20 e na oudu wopamadilaadilo okwa kwatwa onghonga lwoikando ya yooloka kumushiinda shaye. 

Oshiningwanima osha ningwa komukunda Ongaka moshitukulwa shaShikoto okudja ketameko lomwedi ou. 

Opolifi oya hokolola tai ti ouyelele ou owa monika eshi ina ya nakuninga oshihakwanwa ha mono eemadi tadi monduda yokaana. 

Omufekelwa okwa kwatwa po nota pangulilwa oshibofa shekwatonghonga. 

fhamalwa@nepc.com.na