Opolisi moshitopolwa shaShikoto oya tula miipandeko aafekelwa yatatu Omaandaha, shi na sha nedhipago lyomulumentu gomimvo 52 kOniipa moshitopolwa shaShikoto. 

Omukuluntu gwopolisi moshitopolwa shaShikoto Ndeshipanda Iifo okwa ti aafekelwa mboka oya mangelwa kOshikango, ya adhika nomutse gololi ngoka ya li ya fadhuka po nago.

Otaku hokololwa kutya olutu lwomulumentu ngoka omuhingi gomaloli okwa li lwi itsuw pomukunda Okambonde mOmaandaha. Sha ikolelela kolopota yopolosi ndjoka ya pitithwa, olutu lwanakusa olwi itsuwa lwa ekelwahi konima yoshiyale, lwa siikilwa nelapi, ye okwa lala koshikuusinga, a mangwa komagulu nokomaako ye oku na iilalo kombunda.

Otaku hokololwa nakusa a li omuhingi gomaloli ta longele ehangano lyoVan Zyl Trucking, Omaandaha ngoka anuwa okwa li a zi kOvenduka a yi kOndangwa niilonga ye.

Oshikoto oshi itsuwa sha kankamekwa poShoprite mOndangwa, ashike omutse kagwa li gwa adhika ko keloli.

Aafekelwa mboka yatatu oya li ya tegelelwa ya holoke mompangu Etiyali.

Opolisi oya indile moshigwana aahingi yoondjila oonde ya kale aluhe uupathi ethimbo alihe oshoka aafuthi oya ipyakindhila unene ethimbo ndika.

Mehuliloshiwike natango omwa lopotwa olutu lwomukiintu gwomimvo dhopokati lwa itsuwa koWindhioek, taku fekelwa a dhipagwa konima a kwatwa koonkondo.

Natango opolisi moshilongo oya kumagindha oshigwana shi kale sha kotokela ootakisi taya londo oshoka yamwe kaye li moshili, ihe oombudhi dhowala.

Opolisi moshilandopangelo okupitila mepeko lyopolisi oya ti aahingi yootakisi oyendji ohaya adhika noombele oonene osho wo omikonda ya ningila okuyuga aafaalelwa.

Moshiningwanima shimwe oshitalala aanyasha yaali oya li ya ponokelwa komuhingi gotakisi koWindhoek, konima kwa li ye mu lombwele kutya hoka a uka hako ya pula ya falwe. -vkaapanda@nepc.com.na