OSHAKATI-Omukuluntu gwelongo moshitopolwa shaShana Pauline Shapumba ota hiya aavali mboka yena aanona yena uupyakandhi womeho nenge wokulesha opo yaka konaakonwe nokupewa omakende oshali sha mu hongi.

“Kehe omukalimo gomoshitopolwa shaShana ena okanona kena omimvo hetatu sigo19, ihe okena uupyakandhi womeho, naya thike poshipangelo shaShakati, kokakilinika komeho opo ya yakulwe,” Shapumba ta hiya ngaaka. Okwa ti, oshikonga shoka osha tameke momasiku 19 no tashi hulu momasiku 22 gaJanuali, onkene oshigwana otashi kumagidhwa opo shi longithe ompito ndjika yoshali.

Shapumba okwa ti, aanona otaya ka minikilwa nokupewa omakende gawo, ita pu pulwa nando oshimaliwa.

Ndohotola yomeho Helen Ndume okwa ti, okwa longekidha oshikonga shoka oku kwathela aanona mboka yena uupyakandhi womeho, unene mboka haya yi koosikola.

“Onda longekidha ngaaka kokalinika komeho kOshakati, opo tu kwathele aanasikola mboka taya nyengwa okulesha nenge okugwanitha po iilonga yosikola yawo omolwa uupyakadhi womeho,” ta fatulula ngaaka. Ndume ka kwali ta vulu okugandja uuyelele owindji, oshoka okwali iipyakidhila pethimbo ndyoka, ihe okwa kumagidha oshigwana shi longithe ompito ndyika. Omundohotola Ndume okwa tseyika nawa moshilogo onga omundohotola dhingi gomeho.

Okwa kwathele oyendji okumonako, unene aakulupe noyendji mboka ya tandwa ka yali yeweteko omeho agehe, yo yamwe oyali ashike haya monithako eho limwe, ka kele ngaashingeyi oya galulilwa iipala yawo.

Omundohotola nguka okwa kala noku tanda aakokele kiitopolwa yoshilongo nokwa galulile oyendji omeho mboka ya ninga oomvula kaaya weteko.

vkaapanda@nepc.com.na