Auleria Wakudumo
Minista womayambulepo edoolopa nomikunda James Sankwasa okwa indila omalelo opaitukulwa nomalelo edoolopa opo a didilike nokutuma omadina ookansela aveshe ovo vena eendjo domeva, olusheno nomayakulo amwe opaitukulwa nomedoolopa.
Sankwasa okwa ti kutya ookansela vamwe ihava futu eendjo davo domayakulo omalelo edoolopa ngaashi va ufwa okufutwa.
Minista eshi okweshi holola pefimbo ta patulula pambelewa oshiongalelele shotete shomalelo opaitukulwa nomalelo edoolopa moRundu.
Minista okwa holola okwali a pula omalelo edoolopa aeshe opo a tume omadina oohandimwe, eembelewa depangelo, eengeshefa oo eli meendjo omanga omafiku 23 Mayi 2025 inaa fika, ashike eshi osha ningwa ashike komalelo edoolopa a nini.
“Omalelo edoolopa manini oo ashike a pondola okutuma omadina aa shaashi ondishishi kutya ookansela vahapu ovo va kwatela omwaalu wovanhu ovo vena eendjo komesho,” Sankwasa ta ti ngaho.
Sankwasa okwa holola yoo kutya nonande inava hala okupuma omadina, ovo vena eendjo ovena okudi futa kutya otashi pula shike.
“Kutya otashi pula opo va kale hava nanwa keshe komwedi, nena osho shina okuningwa opo va wanife po oshinakuwanifwa shavo,” Sankwasa ta ti ngaho.
Minista okwa indila yoo keshe oo ena eendjo domalelo edoolopa kutya omahangano opaumwene, omahango epangelo ile oohandimwe opo va fute omanga 2026/2027 inai fika opo omeva ile olusheno lavo liha tetweko.
Minista okwa ti omalelelo edoolopa, outukulwa nomalelo opamufyuululwakalo okwa pumbwa oshimaliwa eshi opo va yambulepo edoolopa, omikunda noitukulwa.
Sankwasa okwa pula yoo omalelo edoolopa opo a tume omadina ovakulupe oshoyo ovanhu ovo vena ounghundi kombelewa yaye opo va tale ngeenge tava dimipo eedjo davo.
Eendjo dimwe edi oda ya pombada pefimbo lomukifi woCovid-19 oshoyo okudja moCovbid po2021 fiyo 2022 lwaapo.
Minista okwa ti eendjo dovakulupe novanhu ovo tava lumbu noughundi otadi dimwa po molwa onghenda noshisho osho ongudu tai pangele nepangelo letu lina noshiwana shavo.
Minista okwa indila ookansela novaleli vopaitukulwa opo va xulifepo okuliyambapeka. Okwa ti, oule wefimbo eli a kala koshipundi okwa didilika vahapu tava longifa oimaliwa yepangelo nai, tava ningi lunga itapula, oikumungu yedu ihapu, naikwao ya lundalala.
“Omalelo opaitukulwa nopaedoolopa okwa ninga paife ombwidi yokuliyambapaleka, oukombuda nomafimbo amwe okwa ningwa opolitika noukwamunghoko. Oimaliwa oyo hai tuminwa koitukulwa ya nhuninwa eyambulepo ledoolopa oya ningwa po yokuendaenda,” Sankwasa ta holola ngaho.
Sankwasa okwa holola kutya okwa didilika omalelo edoolopa nopaitukulwa amwe ena ekwatafano naavo hava ningi eteendela. Okwa ti omalelo okwa ninga paife oushina voimaliwa vovanhu ovo hava kwata eteendela veshiivike.