UUVUDHIYA-Aanafalama yamwe oya gandja uusama kehangano lyokwaandjaneka omeya NamWater, sho kwali lya longo okanala komeya hoka haka aandjaneke kiitopolwa yoo nooli, pethimbo lyokwenye.
Shoka okwa li sha etitha iimuna oyindji ya si ke nota monooli omolwa omeya ngoka gali ga pata. Oshoka uupyakandhi womeya ka wushi uupe, elelo lyondoolopa lyaShakati nalyo olya gandja uusama kehangano lyoNamWater, oshoka itali longitha evi, ndyoka lye yape omumvo gwayi.
Mayola gwelelelo lyondoolopa lyaShakati, Lonald Hango okwa ti, uupyakandhi mboka womeya otau hulu ashike uuna ondama ndyoka hayi telekelwa omeya ya nenepekwa.
“Sigo ompaka kapena shoka sha ningwa po, nehangano lyoNamWater itali popi mpoka lya thikama niilonga mbyoka,” ta nyenyeta ngaaka.
Shiinda Mwahi ngoka ena ohambo ye yili kOmapale okwa ti, okwa kanitha oongombe ndhe ndhili ntano, omolwa enota, momasiku moka omeya gali ga pata, okuza momasiku gatatu sigo ga hetatu gaNovomba.
Ta nyenyeta ta ti, oya kala noku kondjitha mpoka taya vulu opo ya hupithe iimuna yawo.
“Otwa kala noku tuta omeya okuza momatale ngoka gali gena omeya, ihe natango osha kala noku pula mondjato, oshoka oko kule otuna okulongitha oohauto,” ta popi ngaaka.
Simson Shekutamba naye ena ohambo yekOmapale okwa ti, NamWater oye ena okupewa uusama oshoka okwali ta longo okanala pethimbo inaali wopala lyo kwenye.
“Oshike inaaya tegelela ethimbo lyomvula, ndyoka yina ko ashike omasiku omashona, NamWater oye a etitha uupyakandhi wo meya,” ta ti ngaaka.
Thomas Nepembe okwa ti, NamWater okwa pumbwa okufuta iimuna yawo oshoka ngeno okwali omeya inaaga pata, nonando iimuna yaandhika ya ndhengwa nale kondjala, ngeno inayi sa.
“Se otwa ikolelela miimuna, ihe okukanitha oongombe heyali poshikando, ekano enene,” ta tsikile okunyenyeta.
Gumwe gwomanafaalama okwa ti, ombelewa yaNamWater oyo yina okupewa uusama oshoka oyo ya tokola okulonga ilonga ,mbyoka ethimbo lya puka, itaya ndhilandhila omaupyakandhi taga vulu ku eta.
Kansela gwoshikandjohogololo shUuvudhiya Timoteus Shivute okwa ti, mboka ya kanitha iimuna yawo ethimbo ndyoka lyomeya ga pata aashona moshikandyohogololo she.
“Omwaalu gwaantu ya kanitha iimuna yawo ke nota otagu yi pombanda oshoka oyendji otaya pitile mo noku longitha etompelo ndyoka, ihe iimuna yawo oyaandhika nale ya sa ondjala, no yaloloka koshikukuta,’’ ta fatulula ngaaka. vkaapanda@nepc.com.na
Ta gwdhapo ta ti, moshilongo omuna oshikukuta, omeya ngoka ga li ga pata hago naga kale etompelo.
Shivute ta ti, nonando NamWater ena ngaa okupewa uusama, natango okwa pumbwa okupandulwa sho kwali a kambandhala okutula omeya momandhiya ngoka ga kala noku tekwa.
Onkamabandhala okumona etompelo okuza koNamWater okwali ya huulile muunyengwi, sho ka kwali itaaya kutha po oongondhi dhawo.
Caption: Iimuna ya si kenota… Aanafalama ya kanitha iimuna yawo kenota sho omeya kwa li ga pata.
Efano: Otwe li pewa