Okuza uusiku wOlyomakaya aayakulwa yamwe yehangano hali andjaneke olusheno konooli (Nored) oya kala mondhime sigo Osoondaha.
Etitano natango aayakulwa yoNored oya li mondhime, sho kakwa li itaya vulu okulanda olusheno omolwa aaniilonga ya yi mekanka ohela sho anuwa ya tindilwa egwedhelo lyoondjambi.
Konima oshigwana sha kala nokunyenyeta, komatango gEtitano Nored okwa ka pitika oshigwana shi lande olusheno.
Omunangeshefa Sonia Paulus gwomomukunda Ompumbu, ngoka e na okasitola koohi okwa ti, onkalo yaNored oya nayipala.
“Olusheno nkene lwa yile uusiku wOlyomalaya, oohi dhandje onde dhi tula kombiliha dhi pwe mo, oshoka onda tila dhi ninge nayi, ihe ngano onda kana nayi,” ta nyenyeta ngaaka.
Joseph Kapuka okwa ti ongeshefa ye yomanwino oyo hayi mu etele omboloto ihe ookasitoma itadhi kala po oshoka iikunwa oya pupyala.
Kapuka okwa indile Nored opo a lundulule nokukandula po uupyakadhi hau eta odhimwe.
Aaniilonga yehangano lyolusheno lyoNored, Etine lya zi ko oya tameke nekanka ndyoka ya holola kutya otali kala po sigo ya yamukulwa kelelo lyehangano megwedhelo lyoondjambi.
Shoka osha ningilwa poombonge oonene dhaNored mOndangwa moshitopolwa shaShana.
Reginald Kock, omuwiliki gopashitopolwa mehangano ekalelipo lyaaniilonga lyoMineworkers Union of Namibia (MUN), okwa ti aaniilonga okuza miitopokwa Zambezi, Kavango East, Kavango West, Ohangwena, Oshikoto, Oshana, Omusati noKunene kombinga, oya tula po iilongitho okuza Etine, notaya wayiminathana mekanka.
Kock, okwa ti oya tameke nekanka lyawo nelalakano okupula oondjambi dhawo dhili konima okuza mo 2024, 2025 no 2026.
“Otwa kala nokupula omawunawa gondjambi dhokomumvo, ihe ewiliko lyaNored olya tinda oku yi tu pa,” ta ti ngaaka.
Ta fatulula kutya omumvo 2025 oya pula egwedhelo lyoondjambi noopelesenda hamano, ashike ewiliko olya ti otali vulu ashike oku ya pa oopelesenda ndatu, shoka ya tindi.
Kock okwa gwedha po kutya aaniilonga petameko, oya li ya pula oopelesenda heyali dhomagwedhelo goondjambi dhaaniilonga, taya kulula ko sigo opelesenta hamano taya hulile puntano ashike elelo lyaNored olya tinda, lyo inali yamukula natango.
Kock okwa ti oya tokola aaniilonga ya tule po iilongitho, na itaya shuna miilonga omanga inaya yamukulwa.
Aaniilonga ye li 235 otaya kutha ombinga mekanka ndyoka.
Omupopiliko gwehangano lyoNored Simon Lukas okwa ti natango keshi ngele aaniilonga otaya tsikile nekanka nenge ya shuna kiilonga.
Ta ti shoka oteshi tseya ashike momukokomoko gwesiku lyonena.