Opolisi moshitopolwa shaMusati oyi li molukongo lwaalumentu 14 anuwa yi iyaka mondholongo mOmandaaha goshiwike shika. 

Omukuluntu gwopolisi moshitopolwa shaMusati Ismael Basson okwa ti aalumentu mboka oyi iyaka mondholongo yaRuacana. 

Basson okwa hokolola kutya aalumentu mboka anuwa okwa li ya piti pomweelo goshitenda gu li pokati koondunda dhaanandholongo nongulu yompangu, ngoka kakwa li gwa pata, e taya piti nokuya momukala. 

“Aalumentu mboka oya tsikile okuteya po omweelo gokuya mongulu yompangu e taya yi meni, taya tatula mo ekende ya pite ya ye kondje,” ta hokolola ngaaka. 

Ta ti kaye na natango uuyelele kutya oya longitha shike okuteyagula ondholongo. 

Basson okwa pula oshigwana shi longele kumwe nopolisi opo aantu mboka yi iyaka mondholongo ya mangwe natango. 

Aalumentu mboka anuwa yamwe Aangola yamwe Aanamibia noya taalela iipotha inene ngaashi omadhipago, omateyo gomagumbo, omakwatokoonkondo nominyeka. 

Sho anuwa kwa ningwa omapekapeko otaku fekelwa oyendji ya piti oongamba ya yi moAngola. 

Pehulilo lyomumvo gwa zi ko, opolisi moshitopolwa shaMusati natango oya li ya lopota aanandholongo ye li 10 yi iyaka mondholongo mOnandjaba. 

Sigo oompaka kape na ngoka a tulwa miipandeko. 

Natango opolisi moshitopolwa shaZambezi oya lopota aanandholongo 31, ya iyaka mondholongo yosasiyona yopolisi yedhina Menias Brian Lubuto muulethimbo womimvo 10. 

Mokat i koonakwi iyaka mondholongo sigo oompaka aantu owala yaheyali oyo ya monika. 

-vkaapanda@nepc.com.na