Aakonakoni yiikwapolitika nosho wo aanongononi yomauyelele ge na sha nomahogololo oya kunkulile oongundu dhopolitika opo dhi hogolole aaleli mboka ye na ontseyo yokuyambula po oondoolopa nokukandula po oompumbwe nomashongo ngono ga taalela aakwashiwana.
Omaukwatya gaahogololwa gookansela oga talika ko ongoshinima sha simana nge tashi ya kaahogololi, unene tuu maagundjuka.
Oongundu dhopolitika moshilongo odh ili tadhi ilongekidhile omahogololo giikandjo noondoolopa ngoka ga tegelelwa ga ka kale ko momasiku 26 gaNovomba.
Omundokotola miikwapolitika Ndumba Kamwanyah okwa fatulula kutya limwe lyomomatopelo aantu ihaya ka hogolola omolwaashoka ookandindate dhimwe dha tulwa komeho koongundu otadhi uulike kaadhi na ontseyo yokuhumitha oondoolopa komeho.
Kamwanyah okwa tsu omuthindo kutya olundji ongundu dhoopolitika ohadhi hogolola ookandidate shi ikwatelela komayihumbato goshilyo shoka nonando kashi na ontseyo yokulela nokweeta ehumokomeho moshitopolwa shoka.
Omushangwa okuzilila kehangano lyomahogololo, Electoral Commission of Namibia (ECN) olya tumbula kutya omwaalu gwaahogololi momahogololo gopiikandjo ogwa shuna pevi noonkondo.
Oshinyanyagidhwa osha ulike kutya omwaalu gwaahogololi ogwa ya pevi okuza poopelesenda 81 mo1992 okuya poopelesenda 38% mo 2020.
Kamwanyah ngono a li wo omulongisikola moshiputudhilo shaUNAM okwa yelitha wo kutya, aakwashigwana yamwe oya sholola molwaashoka aanapolitika ohaya gandja omauvaneko ngono ihaye ke ga tula miilonga ngele ya hogolowa.
Ta totha mo okwaa na iilonga maagundjuka, ompumbwe yomagumbu osho wo uunamiti oyo yimwe yomiinima tayi shololitha aahogololi.