Rundu- Omu yina kumoneka asi kuna kutura yimaliwa yoyinzi konondima, nguuru gomukunda Kavango zoupumezuva Hamunyera Hambyuka kageve uhwi wokuruganesa vanafarama mulyo gokusika koN$50 000 kovanafarama womomukunda. 

Age kahundilire vanagwani mauhwi aga asi vahepa kulisikamena pwavene nokukulika nye nkarapamwe nawo vagwanenemo mauwa aga. Uhwi ou una kara asi yiruganeso yokutekeresa, nomuliu, darate, notenga domema, nayinye oyo kayirende Agribank. Eyi kuna kuyigava nye kovanandima gona womoKavango zoupumezuva nezi zoutokero omu ngano navagusapo ruhepo ntani kuwapukurura nye ekonomi. Sebastian Kandyangu Mukoya gopomukunda gwaShankara moNdongalinenaage kagwene uhwi wokusika ko N$24 954.40. mokugwedako, projeka zaTapeka Lima Tulye ezi zina kara asi zovagolikadi 8, zeruganeno kumwe zovakadi vatunga pomukunda gwaTondoro moKavango zoutokero, kavagwene yomulyo gokusika ko N$24 975.73 muna hamene yiruganeso yomosikunino, tenga zomema, nomuliu ntani darate ngoso. Apa nye kahuyungire posilika esi sokugavera uhwi, Hambyuka kapandwire vagavi mauhwi aga asi nawa sili eyi vana diva asi vanandima vetu ava kurugana yininke ypoyiwa sili nokuvapa hena mauhwi gangesi. ‘’ Uhwi wangesi kapi una kara asi taumuvatere ngelike ndi asi nekoro lyendi, nye nayigwedako hena komuzangu gomunzi nokuhoroka koruhepo, oru runa kara muvantu vetu, yimo ana kutanta Hambyuka, kuhamena eyi ana gwana Mukoya. Mokuwiza nye kwendi kovakadi ava nye vana kurugana yokuruganena kumwe moKavango zoutokero, nguuru kuna kufatwirura yokuhamena omu natulikwakana mokuhamena monondima. ‘’ Magano gokufana ngesi, kuna kara mulyo unene omu vakadi navatameka kupitisira yonondima varete nondja mokupitira monondima. Mukwatelimo gombanga ezi zaAgribank momukunda Kavango zoupumezuva naKavango zoutokero Dusken Mungalisa, katente asi mauhwi yokuvatera nondja, kugavamauwa kovadinkantu ntani kuwapukurura yokuhamena nondima moNamibia. ‘’ Agribank kuna hafa mokugava kovantu vendi notenga domema ntani kutekeresa omu nye ava vavali navakayiruganesa. 

Mauhwi aga taga gava mauwa nomuzangu gomunzi. Elikwamo eli nalivatera vana ndima ava vana kutameka, vakadi novadinkantu monondima. Nondima kuna kara tadigendesa ekonomi, kutulisapo yirugana nokusesupika ruhepo, nayimwe ngoso. ‘’ Nouhwi wangesi, ame tani zin ye nikarugane unene, morwa nina diva asi, monondima, amen ani vhura kutekura nokurera ekoro lyange, ntani tani vatare vanavange kerongo, ntani nani tulisapo yirugana. Ame nina pandura kombanga eyi zina rugana, yimo ana kutanta gumwe gowo vana gwanenemo mauwa, Sebastian Mukoya. -jmuyamba@nepc.com