OSHAKATI – Ovanyasha ve li 1 380 otava ka nangekwa pambelewa mongula kokapale komaudano kOshakati konima eshi va mana omadeulo avo opolifi. 

Ovanyasha ova dja komandiki okudeula ovapolifi ngaashi Simon Mutumba koshitukulwa shaZambezi osho yo Ruben Danger Ashipala endiki li li mOndangwa moshitukulwa shaShana. 

Ovapolifi ava ova mana omadeulo avo oule weemwedi omuwoi. 

Kakukutu kopolifi ta kwafele Major General Anne-Marie Nainda okwa koleka onghundana ei. 

Nainda oku li ta kwafele ongakakukutu kopolifi konima eshi a ulikwa omwedi ou kOmupresidente. 

Okwa ya ponhele yaJoseph Shikongo ou a tulwa manga pedu moilonga yaye kOmupresident woshilongo. 

Onghela ovadeulwapolifi okwa li tava ende momapandaanda odoolopa yaShakati osho yo Ongwediva okulilongekidila efiku lavo lokunangekwa pambelewa mongula. 

Oshiwana okwa li sha hafa tashi tale ovadeulwapolifi eshi tava ende momapandaanda tava ulike efano liwa kutya oshoshi li ova pewa omaudelo ongushu iwa. 

Nainda okwa yelifa ta ti ovadeulwapolifi ove lilongekida okukala va ninga ovanambelewa vopolifi. 

Okwa ti omadeulo okwa enda nawa, ovanyasha ova pewa eetundi de lixwa po pefimbo lomadeulo nanghene ve na okulihumbata ongovapolifi. 

Okwa pula oshiwana opo shi holoke kokapale mongula oku ka tala ovadeulwapolifi eshi va fewa. 

Nainda okwa ti natango momwedi tau ya omafiku 5 Juni otaku kala omadeulo opolifi kodoolopa yaGrootfontein. 

-fhamalwa@nepc.com.na