Auleria Wakudumo 

Oitukulwa aishe konooli oya holola kutya oye lilongekidila okudimbuluka efiku lemanguluko olo tali ka dimbulukiwa momafiku 21 Maalitsa oshilongo ashishe. 

Ngoloneya woshitukulwa shaShana Hofni Iipinge okwa holola kutya neudo efiku eli otali ka dimbulukilwa mokapale komaudano mOshakati po10h00. 

Efiku otali ka dimbulukiwa koshi yoshipalanyole “Beyond 35 for a prosperous future,” oshilongo ashishe. Omupopi a fimana oye Omuprima woshilongo Elijah Ngurare. 

“Ovakwashiwana okudja koikandjohoololo aishe 11 moshitukulwa otava ka tutwa koiendifo oyo tai ka shiivifwa nale kutya otai ka tuta okudja peni nokuya peni moshikandjohoololo keshe,” Ngoloneya ta holola ngaho. 

Ngoloneya okwa holola kutya aishe oi li peenhele okudimbuluka efiku eli mOshana ngaashi Omupresidente Netumbo Nandi- Ndaitwah a holola kutya efiku nali dimbulukwe oshilongo ashishe opo Ovanamibia aveshe va mone omhito yokuholoka nokudimbuluka peenhele davo. Iipinge okwa indila oshiwana shi dimbuluke efiku eli nombili, noukumwe, efimaneko noumwainafana moshiwana. 

Ngoloneya woshitukulwa shaHangwena Kadiva Hamutumwa okwa holola kutya efiku eli otali ka dimbulukwa modoolopa yaHelao Nafidi moshitukulwa shaHangwena. 

Hamutumwa okwa ti efiku eli otali holola ondjokonona yemanguluko laNamibia notali yandje omhito iwa koshiwana ashishe opo shi dimbuluke omapendafule oo eli yandjela eemwenyo dao opo oshilongo shi manguluke. 

Efiku eli otali ka kongolola ovanambelewa, ovaleli vopamufyuululwakalo oshoyo oshiwana okudja koikololo aishe yaHangwena. 

Ngoloneya woshitukulwa shaMusati Immanuel Shikongo okwa shiiva oshiwana opo shika tyapule nokudimbuluka efiku eli olo tali ka kala ko ponhele yomaulikilo oipindi Ehao moshikandjohoololo shaKahao. 

Shikongo okwa ti momafiku 21 Malitsa Namibia ota wanifa eedula 36. Okwa ti osha fimana okundjokonono osho sha holoka efimbo oshilongo shali moukoloni nanghene sha manguluka oshoyo opo sha fikama nena. 

“Efiku eli ohali fimaneke omapendafule oo a xulifa omanga taa kondjele oshilongo shi manguluke oshoyo okutumbaleka opo oshilongo sha fikama nena,” Shikongo ta fatulula. Ngoloneya woshitukulwa shaShikoto Sacky Kathindi okwa holola kutya efiku lemanguluko otali ka dimbulukwa moikandjohoololo aishe 11 yomoshitukulwa. 

Omanga Ngoloneya woshitukulwa shaKunene Vipuakuje Muharukua a holola kutya efiku ledimbuluko lemanguluko otali ka tyapulilwa modoolopa yaKhorixas moshitukulwa shaye. 

-awakudumo@nepc.com.na