Auleria Wakudumo
America ota ka tuma ovanhu ve fike pomiliona 1.4 koilongo ya fika 170, mwa kwatela Ovanamibia ve li 19.
Eshi otashi ningwa eshi omupresidente mupe wAmerica Donald Trump a eta omalunduluko meeveta dihapu doshilongo, mwa kwatelwa okutuma ovanhu aveshe ve li moAmerica vehe na omikanda dokukala moshilongo omo.
Odokumende ya yandjwa kehangano lokushuna ovadjadjai koilongo yavo hali ifanwa Immigration and Customs Enforcement (ICE) otai ulike omadina oilongo osho yo omwaalu wovanhu ava tava shunifwa koilongo yavo, wa etwa po vati muNovemba 2024.
Ehangano ola ti America okwa itavela kutya keshe oshilongo oshi na okukala sha tambula ovanhu vasho, naavo ve na eedokumende da wana po, otava kala ngaho moAmerica.
“Okuhalongela kumwe koilongo tai shunifilwa ovanhu vavo, ohashi eta America a kwate efimbo mokushunifa ovanhu ile fimbo limwe elipumomumwe loilongo,” ICE ta ti.
ICE okwa holola yo kutya oha kala e na oudjuu ngeenge tashi ya mokutuma ovadjaidjai koilongo yavo ngaashi oyeendifo, novadjadjai vamwe vati itava longele kumwe navo.
-wakudumoauleria@gmail.com