Kaise a ǀgū ǁaeb, wekheb ǀgaibas ge Angolab ǁga ūhâ i saris di oahās khao!gâs ge, !Hūb di ǁûs, Nandi-Ndaitwahsa ǂoa ge wekheb di Donertaxtsēs ai ǀgam tsēra nî !khōǂgā sarisa Botswanab tsî Zambiab hâkha ǁga ge ūhâ i. Nē saridi ge !Hūb di ­ǁûs ūhâ ǀaweǁguib, Namibiab tsî ­ǁanǁare!hūgu ǁaegu hâ sîsenǁareba ai!â ǀgaiǀgai tsî ǁawoǁawos dide. Botswanab di Duma Bokob !aromas ge ge ǀgamǁî ǀhao i tsî Zambiab di Hakainde Hichilemab di ǂguro !nā i, ǀguitimî tsîs ge 21 ǀKhūǁkhâb 2025 dis ai nē berosa a ū!khunis khao!gâs ge Nandi-Ndaitwahsa ǂhanusi ǁ­gamǁ­arede Bokob ǀkha ge ūhâ i. Nēpa ai!hūba gere ǁams ge sâuǁkhāsib !nâ sîsenǁares sîsenga ǂnuwis !aromasa, tib ge ǂhôamāǂuis sekretareb, Alfredo Hengariba ge mî. ǁÎb ge a mîs ge, ǁgamǁaredi ǀnai nē !hūkha ­ǁaegu hâ ǀkhamasa diplomatise !gaeǁares hîa !nae!khaixa!nâ, hâǁareb sâuǁkhāsib tsî !hao!nāsi ǁnaetigu ai a !noma!khō hâs ai oms ai ge hâ i. “Nē sîsenǁare saris ge !ēs ase Namibiab !aroma ī, hîa ai!âba !oa ǁî!nāpe hâ !gaeǁares Botswanab ǀkha hâs, tsî ǀgapi !harib Bi-National Commissions dib ai māsa,” tib ge Hengariba ge mî.

ǁKhāti ra ge nē ǂgaeǂgui-aora ǀgauga gere ôa-am !hûǁaresa projekna kai ǂnuwisa xūn !aroma ūhâsa, aiǁgause Trans-Kalahari Kai daoba ǁkhawa kō!gâ tsî ǂgaoǀkhāsa !harib ai sī-ūsa, ǁnā daob nē !hūkha ǂharugub !aroma ra !hûǁare amaga. ǂOa ge wekheb di Fraitaxtsēs ais ge Nandi-Ndaitwahsa Zambiab !nâ gere !âubasenhe. ǁÎs di saris ǁnā !hūb ǁgas, ǁîs di ū!khunis beros dis khao!gâs a ǂguro !nāses ge ǀkharisi ǁgam­ǁaredi tsî !hûǁares !aroma a ǂhâbasa. Nē saris ge “ǁî!nāpe hâ !gaeǁares Namibiab tsî Zambiab hâkha dis, hîa !gao!gaob âsa hoaǀkhākha xu hâ !gôagus tsî ǀgoragusa ǁkhāsigu aitsamamâbasens ǁgoaǂuidi ǁaeba xu hâna,” tib ge Hengariba ge mî. Nē ǀgam !hūkha ge kuriga !goaxa !nae!khaide !kharaga !âgu !nâ ūhâ, !khōǂgā hâse !hū-omkhâis, maindi ǁaxasin, ǀgaib, ǁgau!nâs, ǂurusib, ǂharugub tsî ǁguiridi, ǂnamipeb tsî !narisarimas, !nari!oabadi tsî ǁnâuǂharugus, ǂgamǂgamsenǀhurun tsî !hao!nāsi ­ǁnaetin tsîna, ǂhanusi !âba ǁaraǂui tama hâse.

Danase Zambiab saris tawa ra mâǂoas ge, ǀgam !gankha Luzakas !nâ ǁgoekha nî Namibiab ai!âkam ǁōǂoa hâ !hūbǁûkha ǂgaiǀonhes diba.

Kasama !ganni ge ǁōǂoa ge !hūb di ǁûb, Hage Geingoba ra ǂgaiǀonhe tsî Sadzu !ganna, Namibiab !Huis di !hūbǁûb, Sam Nujomaba !oa. ljsaon@nepc.com.na