OMUNGWELUME – Ovakwapata vaEliud Shilongo Hamukwa (38) oo taku hokololwa a dipaelwa peinda lopolifi pOnhuno oshivike sha dja ko, otava pula epangelo opo li kwashipaleke kutya omakonakono otaa ningwa pauyuuki pehe na oulingilingi tau longifwa.
Hamukwa oo a li omushingi wololi okwa pakwa Osoondaxa komukunda wavo Omungwelume moshitukulwa shaHangwena.
Okwa xulifila mololi koshipundi yokomesho efimbo loufiku.
Oom Kamati ou kwa li ta popi ponhele yovakwapata okwa ti ova hala etomheno le lixwapo kutya omolwashike omupolifi a dipaa Hamukwa shaashi fiyo opapa ina va lombwelwa.
“Ina tu hala ouyelele tau holekwa. Otwa hala okuuda oshi li ngeenge Hamukwa oye e na epuko ile omupolifi oye a puka,” ta ti.
Kamati okwa yelifa ta ti omwenyo waHamukwa itau tulumukwa nombili ngeenge opolifi oya longifa oulingilingi okuninga omakonakono.
“Ngeenge Hamukwa okwa ninga epuko omolwashike ovapolifi ina ve mu kwata po,” ta pula.
Okwa pula epangelo opo li kale ta li ningile ovapolifi omakonakono tete manga ina va pewa eendjebo shaashi ovapolifi vamwe itava dulu okulongifa eendjebo.
“Otu na ovapolifi ve li ninga eengholwe osho tashi ulike kutya itava dulu vali okupewa eendjebo ngeenge ve li moilonga molwashi otava dulu okudipaa ovanhu,” ta ti.
Kamati okwa kumaida oshiwana opo shi kale tashi liufa komilandu odo da tulwa po kopolifi opo ku kelelwe ovanhu tava dipawa nokumonifwa oiponga kovapolifi.
Omufekelwa ou e li a dipaa oye Sergeant Dimbulukeveni Namhila weedula 43, nokwa nyenwa omhito yoku li futila mo modoolongo eshi a holoka momhangu yaHangwena oshivike sha djako.
Oshibofa shaye osha undulilwa komafiku 3 Juni 2025 opo ku ningwe omakonakonako omoule.
Kakuku kopolifi Inspector General Joseph Shikongo okwa pula oshiwana opo shi ngungumane fiyo omakonakono taa pu okuningwa.
“Opolifi oye li pyakadila nomakonakono moule,”a weda po.
Ofamili yaNamhila okwa li ya holoka keumbo loHamukwa okuyandja omahekeleko nokutopolafana oluhodi efiku lepako nefiku lexupulifo.
Ina yaHamukwa, Loide Shilomboleni okwa ti okwa fiwa pomutenya komonamati molwashi oye kwa li ongudi yepata.
Okwa ti okwa li a pewa omaano ounona vane ashike paife okwa sha lapo nokaana kamwe kokakadona.
Ovashiinda ova hokolola Hamukwa onga omulumenhu e na ombili nomikalo diwa.
Hamukwa okwa fiya po omonamati weedula ehayali.