Linca Dishena
Ombudsmanni, advokaat Basilius Dyakughab ge ge mî, Angolab ǀgôan hîa Namibiab !gangu !nâ !omkurusa xūna ra ǁamaxūman, kurin !naka hâ ǀgôan sîsen kaihes !âb !nâ ǁnātama hâsa. ǁÎb beros ge ǁîn ūhâ ǂâiǂhansens tsî ǂgans ai ôa!nâde ra dī.
ǁNāpab ge ǂoa ge wekheb di Wunstaxtsēs ai Angolabgurisas, Ombudsman Florbela Rocha Araujos ǀkha ǁnâuguxoaǁgui-e gere xoa!gao soab aib ge, Dyakughaba ge mî, ǁîb beros mâisan ge nē ǀgôana !gangu !nâ sī gere !harasa, tarenan tsēkorobe ra dī !khaisa ǂanǂuis ase.
Ôa!nâde xu ge a ǂoaxas ge, nē ǀgôan ǁîn aitsama kuruhâ !omkuruxūna gere ǁamaxūsa, tsîs nēsa United Nations (UN) di xoa!gā!gās kurin !naka hâ ǀgôana sîsen kais dis !nâ ǀgau tama hâsa.
Angolab di Ombudsmans, Florbela Rocha Araujos ge ge mî, nē ǁnâuguxoaǁguib ra ôa-am !khaisa, sîsenǁareb di ǀgaiǀgais hîa ǂhanusi !oabade hoan !aroma sī!nâhesa īǁkhā kais, khoesi ǂhanuga ǁkhaubas tsî hoa !hūkha ǁanǂgāsaben !aroma !gâi hâba ai!gû-ūs tsîna. UNs di xoa!gā!gās ǀgôana sîsen kais dis !oagus ge ǀgôa sîsensa, ǁnāti ī sîsengu hîa ǀgôana ǁîn ǀgôasis, sī!nâ ǁkhān a ǁkhāsib tsî khoesisa ra ǀhanana.
Nē sîsen !nôan ge ǀgôa-e sorosise tsûtsû tsî ǁnâu!āb omkhâisens tsîna a ǂkhôa ǁkhā. Dyakughab ge a mîs ge, nē !nae!khais !nân nē ǀgôana ǁîn di ǁgûn ǀkha Angolaba xu Namibiab ǁgauǁkhāsib !aromadi ai hā hâ !khaisa tsîn ǀnî khoe-i xa !gaehe tsî sîsen kaihe tama !khaisa. Nē ǁhōbas ge sida berosa ǂgaeǂguira ǂhanub ǂans !naka ge sī-ū tsîb ge !hūǂnûǁkhaebadi !nâ-ū ǂhanuse ge sîsenǂamhe. Dyakughab ge ǀaro tsî a mîs ge, !nāsa !gôab di ǀgôan ge hoa !hūkha xu ge hâ i sîsenǁareb !nâ-ū, Angolab ǁga a ǁaru-ūuǁkhāsib mâsin xa ra !aromahese Namibiab ǁga a oahāsa.
Nau ǀkhāb aib ge ǂhanusi ǂnoaba-aob, Kadhila Ammomoba nē mâsiba ǀau tsî ge mî, Namibiab nē ǀgôana ra ūǂgā !hūb ase !auga!hūsi ǂgaoǀkhāde ūhâsa, nē ǀgôana ǁkhaubas tsî hîǀhuruhesa xu !ûis disa. Ombudsmanni ge !ereamxasiba ūhâ tsî !hūb di ǂgaeǂguisa nî ǁguiǂam ǂhanuse tsî ǂgaoǀkhādi !oagu nē mâsiba kōǀîsa.