Abraham Mwanyekange 

Ovashikishiva vaNamibia Antsino “Di Maria” Twanyanyukwa na Naftal Negongo ova hoololwa opo va kape we omadeulo koMorocco okulilongekidila oAfrican Cup of Nations (Afcon) U/17. 

Omadeulo otaa tetekele omaudano ekopi loiwana ya Africa tali ka danwa kwaavo veli koshi yeedula 17 mu Mei mo Morocco. Di Maria na Negongo ota va ka waimina ovashikishiva ovaAfrika vakwao veli 68. 

Omunashipundi wovashikishiva novayeluli voupandela moNamibia, Erastus Shilunga okwa ti okwa hafa unene eshi a uda onghundana. 

“Onde va hafela unene eshi tava tula epandela la Namibia pombada. Natango ota va palele yo vakwao ondjila opo va mone eemhito ngaashi vo. Onda hala okumona ovashikishiva vahapu tava mono eemhito pondje yoshilongo,” Shilunga ta holola ngtaho. 

Shilunga okwa ti mopaife Namibia okuna ovashikishiva osho yo ovaheluli voupandela 12 ovo va tambulwa ko mounyuni. Mwaavo veli 12 omuna ovashikishiva vavali osho yo ovaheluli voupandela vavali voomeme. 

“ Osha ulika ekufo mbinga liwa loomeme momaudano okatanga kokeemadi taku hapupala,” Shilunga ta ti eshi oshiwa. 

Negongo okwa ti kuye ehafo lambishi meumbo mwa tomwa. Ta ti otaka longa noudinini opo a ulike kutya ko Namibia ina ku dja okakombo kapofi. 

Okwa weda ko ta ti okufudila okashiva okwa dja nasho nale. 

“Mopaife ngaha ohandi pula ashike komesho nondjodi yange oyo nda kala nayo,” ta ti. 

Negongo okwa ti ngee ta shiki okashiva oha tyapula unene molwaashi omashongo ihe a omo. 

“Ovadani oshoyo ovadeuli paife oveli pondodo yopombada vo ove udite ko kutya omushikishiva oshike mokapale,” ta holola ngaho. 

Di Maria na Negongo konima yomadeulo otava ka kala vamwe vomwaavo tava ka kwatela komesho okushika okashiva moudano wo AFCON U17 tai tameke 13 Mei moMorocco. 

-amwanyekange@nepc.com.na