Abraham Mwanyekange 

Oudano wovakokele nedina lashiivika nawa ‘Battle of the Southern Africa Development Community Veterans Soccer’ ouli moNamibia neudo. 

Oudano ouli ko momafiku 2 fiyo 3 Mei 2026 mokapale komaudano Sevelinus Ashivudhi moshitukulwa shaShana. 

Oudano ou owa teelelwa uka hovele efimbo longula Olomakaya nokwa teelelwa aka kale taa xulu pomulongo woufiku efiku keshe. 

Ovadani vovakokele ovalumenhu novakainhu okudja poZambia, Angola, na Botswana ovo vadana nale etanga lokeemadi oshoyo lomokambaba ovo tave ya okudana. 

Ovakokele tava ka kufa ombinga moudano oo ovava vena eedula 40 oku ya pombada. Ovakokele otave ya oku ulikila ovanyanyamaulu kutya ombadwa nayo oya li ngaho ongobe. 

Umwe vomovaunganeki voudano ou, Sammy Mushelenga okwa ti elalakano loudano ou limwe alike. 

“Otwa hala okweeta ovadani vakulu pamwe unene ovo va danene nale eedula da pita. Efimbo limwe ovanhu ava eshi va xulifa po okudana ihave li mono vali, Ei oyo omhito hatu ka longifa opo tuva hanganife vo veli mone nokunghonopaleka oufelende,” Mushelenga ta holola ngaho. 

Mushelenga okwa ti eshi oshikando shitinhe omaudano oo taa kufa ombinga. 

“Odula ya dja ko otwa li koBotswana. Neudo fye na Angola ofye hatu kundu ovaenda,” ta holola ngaho. 

Mushelenga okwa indila oshiwana opo shi holoke molwaalu muhapu okutala ounongo vovakokele. 

Okwa twikila ta ti ota shi ka kala oshikando shotete oudano ou tau ka kwatela mo oudano womokambaba. Ta ti elalakano oku kwatela mo omaudano a yooloka nokuya komesho. 

Mokapale pefimbo loudano ou, omunhu otaka futa ashike koxulo yeenyala. Mushelenga okwa ti oimaliwa ta i ka dja poshivelo ota i ka longifwa okuyambidida oveenda ngeenge tashiya peendja oshoyo omulele. 

Mushelenga okwa indila yo ovanangeshefa vomoshitukulwa shaShana nomoNamibia alishe koonono opo va kufe po omhito oyo opo va kangeshefe pefimbo lomaudano. 

Mushelenga okwa pandula omahangano oPalm View Hotel, Alugodhi Engineering oshoyo makwao oo a ninga oudano u kale wakufa ombinga. 

Mushelenga okwa ti oudano kaushi as h ike ekondjifafano ka kele otaatula kumwe omidingonoko nokudimbulukifa kutya ovakokele ova ninga shike momaudano peedula davo omilongo yetu. 

-amwanyekange@nepc.com.na