ONGWEDIVA – Omukulunhu wongudu yoBody of Christ Party (BCP) Festus Thomas okwa ti otava ka tuma ovanhu 10 tava di mongudu yavo tava ka kufa ombinga momahoololo oukaansela koikandjohoololo 10 yomOhangwena.
Okwa ti otava kufa ombinga koikandjohoololo ngaashi Okongo, Eenhana, Epembe, Ondobe, Oshikunde, Ongenga, Ohangwena, Endola, Oshikango osho yo Omundaungilo.
Meenghundafana va ninga onghela naKundana, Thomas okwa ti natango BCP ota ka kufa ombinga momahoololo omalelo eedoolopa ngaashi kEenhana, Helao Nafidi osho yo Okongo.
Okwa yelifa ta ti kEenhana ota ku tumwa ovanhu tava di mo-BCP ve li 12, osho yo koHelao Nafidi nOkongo.
BCP ongudu i li komutumba weumbo lopashiwana konima eshi ya mona oshipundi shimwe omudo wa dja ko pefimbo lomahoololo.
Festus Thomas oye a kalela po ongudu ei keumbo lomutumba wopashiwana.
BCP ongudu ya totwa omudu 2023 nelalakano lokupopila eengeleka doshiveva odo da ninga oihakanwa yokuhanaunwa po komikunda nomeedoolopa.
Okwa hokolola ta ti ngeenge oilyo yo-BCP oya hoololwa okuninga eekaansela moshitukulwa shaHangwena otava ka yandjaneka edu kovafita opo va ninge eengeleka davo.
“Eengeleka doshiveva oda ninga oihakanwa yokuningilwa okatongo unene tuu komalelo opamifyuululwakalo shaashi ihadi pewa onhele yedu yokutunga,” ta ti.
Okwa ti natango BCP ota kandula po omahepeko omomaumbo eshi ta ka longela kumwe nopolifi osho yo ovaleli vopamufyuululwakalo.
“Ohatu ka kondjifa onghalo yokatongotongo moshilongo osho yo onghalo yenota lomeva tali denge oshiwana monooli,” ta ti.
“Otwa didilika oshiwana moshitukulwa shaHangwena tashi dengwa kenota koikandjohoololo ya yooloka monooli,” ta ti.
Okwa ti oshiwana nashi kwashipaleke kutya otashi hoolola BCP shaashi otashi ka etelwa omayakulo a yooloka popepi.
“Indeni mu ka hoolole BCP shaashi ookansela vetu otava ka longa nondjungu okuyambidida oshiwana,” ta ti.
Thomas okwa ti natango ookaansela vavo otava ka longela kumwe nouministeli wounamapya okuyandjaneka omadeulo kovanyasha ounamapya oshoyo omikuli doshimaliwa shokueta po oikunino.
Okwa yelifa ta ti natango BCP ota ka kwashipaleka kutya oshiwana osha mona eenhele domadu dokutunga omaumbo keedoolopa da yooloka.
Okwa ti oshivike eshi okwa li a mona omhito yokutalela po Omupresidente woshilongo Netumbo Nandi-Ndaitwah omo kwa li a e mu lombwela kombinga yeengeleka doshiveva tadi ningilwa okatongo.
Thomas okwa ti onghalo yeengeleka tadi hanaunwa po paife oya shuna pedu molwaashi okwa eta po elunduluko eshi a kalela po ongudu yavo keumbo lomutumba wopashiwana.