ONGWEDIVA – Omupresidente wongudu yomhilameno yoBody of Christ Party (BCP), ‘Bishop’ Festus Thomas okwa ti ota lundilwa eshi vamwe voilyo yongudu yavo tava ti ota longifa oshimaliwa shongudu okulanda omaliko aye opaumwene. Oshivike sha dja ko vamwe voilyo yongudu yo-BCP okwa li va ngudumana kOndangwa tava pula omupresidente wavo Thomas opo a kufwe oshinakwanifa shOupresidente shaashi vati ota li po oshimaliwa shongudu. 

Ova shanga omukanda nyenyeto tava ti kashi li pauyuuki eshi omukulukadi waThomas oye a ningwa omukulunhu koshikondo shoimaliwa osho yo okuyandja epitikilo ngeenge moshikefa tamu di oshimaliwa. 

Ova popya tava ti Thomas okwa landa otuwa yaye yopaumwene a longifa oshimaliwa sha dja moshikefa shongudu. 

mOmukanda omwa shangwa kutya Thomas ngeenge ta pulwa kutya omolwashike ta longifa oshimaliwa nai vati oha ningile ovanhu omatilifo nokuvanyamukula nai. Eshi a ninga eenghundafana naKundana onghela Thomas okwa ti oipupulu aishe oyo ya shangwa momukandanyenyeto. 

“Kape na oimaliwa ya longifwa nai. Oshimaliwa osha longifwa pamukalo muwa, onda landula omilandu neemhango dongudu,” ta ti. 

Thomas okwa ti oku na eembapila da yela odo tadi yandje ouyelele kutya oshimaliwa shongudu yavo osha longifwa okulanda oinima ilipipo. 

“Otu na ovanhu ovo ve na owino mokuninga omavalulo kutya oshimaliwa osha longifwa ngahelipi. Kape na oshimaliwa sha liwa po ngaashi ovanhu tava popi,” ta ti. 

Okwa hokolola ta ti ombelewa yaye oya yandja oshimaliwa kovaulikwakansela vongudu yavo opo va dule oku ka ninga oikonga yomahoololo komikunda nokeedoolopa. 

“Ovaulilkwakansela ova longifa oshimaliwa okuningifa omafo, okulanda oumbindja, omambako nosho tuu oipumbiwa oyo hai longifwa poikonga yomahoololo,” ta ti. 

Thomas okwa yelifa ta ti ovanhu ovo tava kakeke edina laye kutya ota li po oimaliwa yongudu, ove li ovafita ovo kwa li tava pula okupewa oimaliwa yokukatungifa eengeleka davo ashike paife ova handuka eshi a ti itava pewa oshimaliwa shaashi kashi shi shokutunga eengeleka. 

“BCP ota landula omilandula opo da tulwa po kepangelo ngaashi naana eengudu dopopalitika adishe tadi lihumbata,” ta ti. 

Okwa ti okwa landa otuwa oyo hai mu twala koilonga noshimaliwa sha dja moshikefa shongudu. “Otuwa oi li kedina longudu ndele kai shi yange. Ngeenge mongudu onda di mo otuwa itandi i nayo,” ta ti. Okwa ti momudo tau ya muJanuali otava ka ninga omutumba omo oilyo yongudu aishe tai ka ufanwa ndele tava kundafana nokukala va kandula po oshikumungu eshi. 

Okwa kumaida oilyo opo i kale nombili noukumwe. “Oshiwana nashi ka hoolole ovaulikwahoololwakansela vongudu yetu,” ta ti. 

-fhamalwa@nepe.com.na