Bukalo- eruganeso yimaliwa momudona kuna kara nye mondango gendeso zaBukalo, omu muna hamene yimaliwa yokusika ko N$470 000 vatambesera kelikwamo lyoBuild together mokudika mambo kupitira melikwamo olyo, kuna kuzuvhika asi vayivaka. Vagazarerwa vatatu vavali varugani vanare ano ogu gumwe simpe murugani kuna kuvagazarera asi yiwo vamwe vana kara mowidi wangesi woyimaliwa.
Sirapotwa sangesi vakasipaturura kovaporosi vaNamibia moutano kaupwire. Eyi kayikweme kutunda tupu opo kavagwene manangwiro kwaMinistera gonodoropa nekuliko nomukunda doponze James Sankwasa omu kavatanterere asi ndango zahepa kugusa etokoro lyopaveta vakapaturure sirapotwa kowo vana kugazarera. Mukurona pamberewa zondango zodoropa Anna Sazita, kayinkondopekere asi vana kazegurura sirapotwa. Yii ose tuna kazegurura sirapotwa kovaporosi vetu womodoropa zaKatima Mulilo. Uzoni ou kuna kara wokugusa yimaliwa kombanga vahana kugwana epulisiro, kutunda tupu mwaJanuary 2021 dogoro mo June 2023, eyi vagusa nye mo account zondango melikwamo lyaBuild together account ezi zakara ko First National Bank moKatima Mulilo.
Ndango account zawo kuna kulikida asi yimaliwa yokusika ko N$470 000 kwayinanamo vahana kukwama elikwamo lyakarapo ntani kapi kuna kara yimbapira youmbangi nkenye. Mokukwama komukurona pamberewa, katente asi eyi nye vakona konak una kumoneka asi awo kwakananako yimaliwa eyi kwahana yimbapira nkenye ntudi sooso sika kara asi zomomahina makura kwato umbangi nkenye. Vakona koni kwagwana hena asi kapi veranda nomateliyere dokutungisa, edi ngano veranda asi dokukadikisa mambo ogo, eyi nye ngano vagavera kovantu owo vana kugwanenamo mauwa.
Mokugavako uzera, Sazita mo 2024, gatuliremo asi vahepa kugwan vataruruli wosipesiyare vana kutunda koministeli vayatare ngapi varuganesa yimaliwa eyi yoBuild Together.
Varugani ava vanare awo kuna kutanta asi oyo varugana hawe yiwaawa morwa awo kwakwama ngendeseso zakarapo. Nokutanta asi awo yiwo vakara nononkondo morwa yiwo ava sayina kombanga, nsene tavagusa yimaliwa oyo, nsene vana gwana managwiro kwaCEO.
Awo kuna kuyimona asi Sazita kuna hara tupu kuzonagwisa mukaro gwawo gweparu omu ana kuvatura nye asi awo kwaruganesa yimaliwa mepuko vahana kukara noyihepwa yina gwanene. Udona ou onoreta kwetu kumwe nondango nokuvhurasi kutambura. Ekoro lyetu novaholi vetu ngesi kuna kutumona nye asi ose wokoraption, twavaka yimaliwa yombunga, vagazarerwa kwatjanga mbapira zize kwaCEO omu vana kumuhundira asi gahepa kutjanga mbapira zokuhundira egusiropo mokuzonagura mukaro gwawo gomuwa vakara nago.
Mukurona pamberewa ganyoka kuyirugana oyo, nokutanta asi age kwasikisamo situmbuklira sendi ngokukara asi mukurona pamberewa gondango ozo.
Morwa sinke nanipulira egusiropo mokurugana sirugana satumbukirange? Nahepa kupura egusiropo morwa kwahundira ekonakoko lyosipesiyare? Ame kapi nina kuyimona ngoso,” Sazita yimo ana kutanta ngoso.
Sihorokwa sangesi sina ninkisa nye vatungimo modoropa zaBukalo vakare vana ligaunuka, omu vana vana kuvatera murona pamberewa, omu ana hara asi yininke yahepa kuyuka, ano vamwe kuna kuyimona asi vagazarerwa ava kuna kuvataparara tupu pwahana konda.
-anakale@nepc.com.na