KATIMA MULILO – Kasamulaho alilimo zakupumbama, maikuto atukuluho yasikiliti sa Caprivi sapili, ili sikiliti sa Zambezi cwale, natumukile Labulalu kasamulaho kopano yehanisizwe ya United Democratic Party (UDP) necauzi mwa Katima Mulilo. 

UDP ibonahala kubifa, ilaela kuli ibata kuikemela nikuli bababona zasilelezo mwanaha Namibia balundulwe mwa sikiliti. Kucaula nekupumbuzi misunga mwahala sikwata sa bakwenuheli ba Caprivi ni mubuso wanaha Namibia, yekuta kwa lilimo za 90. Mubuso hautiseza kuli sikiliti kikalulo yanaha Namibia, kopano ya UDP izwelapili kulwanela kuli tutengo twa kwanda’ naha tuitenge nikulemuha lilikakalezo zakuli bahanelwa tukuluho.

Nihaike mapokola nebafile taelo yakuli sikwata sihasane fa Musika wasicaba wa Katima Mulilo, bacauli batokwa kusuta mi bazwelapili kubala liñolo la linonge patalaza. Liñolo la linonge neli baliwa ki Muñoli wa UDP Ronnicah Sipiho, mi neli swanela kutambekiwa ku mubusisi wa sikiliti sa Zambezi Lawrence Sampofu, ili yana sika bonahala. Liñolo lene liliba kwa mubuso wanaha Namibia, neli yandulula lipilaelo, kungelela cwalo ni likakalezo za kuloba liswanelo zabutu, kuhanelwa kuitenga mwa lipolitiki, ni nyandiso yakwamulaho ya bayahi ba Caprivi. “Kopano ya UDP, ifitisa liñolo la linonge kwa mubuso wanaha Namibia kuamana ni litaba za Mutayi wa Caprivi. Caprivi itokwa kuikemela hakutaha kwaliswanelo zabona za lipolitiki. Basweli kunyandiswa, kubulaiwa, kutamiwa ni kutukufazwa kimubuso wanaha Namibia,” nekubulezi Sipiho.

Sipiho hape nafitisize likakalezo za mabita matuna, lipulao zakwamukunda ni kutondahala kwa bayahi ba Caprivi, kalikakalezo zakuli mubuso usinyasinya litukelo zabatu. “Haiba Caprivi kikalulo yanaha Namibia, kiñi hane ba sebelisize Mulao wa Upa wa Caprivi Strip, wa Bulishumi wa silimo sa 1999? Hape neba ambozi ni mañi?” abuza. 

Azwelapili, “lukupa Mueteleli wanaha Namibia, Ya Tompeha Netumbo Nandi-Ndaitwah, kulaela Sisole sanaha Namibia kulunduka mwa mubu wa Caprivi, kapilipili.”

Kopano ya UDP hape ilaela kuli mapatinti balipolitiki ba Caprivi balukululwe, nikuli babali kwanda’ naha bakute nikutaleleza “tumelelano ya la 5 Njimwana 1964.” Hane bacaula cwalo membala wa katengo kababahulu ka UDP Alfred Kapokola natamilwe nakonyana ki mapokola hamoho cwalo ni Sipiho ni membala yomuñwi, kono neba balukuluzwi kasamulaho basika beiwa mulatu.Mubakweli yomuhulu wa sipokola mwasikiliti sa Zambezi Joseph Nehemia, nanyatezi kulukululwa kwabona kakufiwa mamela kusabisa misunga ya lipolitiki. 

Mifilifili ya kale neli mwahala sisole sa Caprivi, ili sikwata sa bakwenuheli bane babata kukeyula sikiliti kwanaha Namibia, sene si etelezwi ki Mishake Muyongo, kulwanisa mubuso wanaha Namibia. Nebakile bataseza tolopo ya Katima Mulilo la 2 Muyana 1999, kono mazazinyana feela mubuso wanaha Namibia wapyata milelo yabona. 

Muyongo nakile abaleha kuliba naha Denmark kwasaliteni ni kachenu.