ǁNāpab ge 45 ǁōgu, koro kurin !naka hâ ǀgôaron hîa ǂûǂûxase ǂû tama is ǀkha a !gae-aresa !aromadi xa ge ǁōna ǂguro !khare !âb nē kurib dib !nâ !nuri hâ is khao!gâb ge Omaheke khariba ai!gûgaru, ǂûn ǀorosib tsî !gâiǂâu tamase ǂûs di !gomsin ǀkha !khamsa, ǂKhoesaob tsî Aoǁkhumuǁkhâb hâkha di ǁaeb !nâb ge ǀgui ǁō-i tsî 11 ǀasa !nae!khaide a !nurise.
Sîsengu tsî !Nari!oabadi Ministeri, John Mutorwab ge ge mî, ge ǂoa ge wekheb !nâ ǀAeǁgams di beros Trans-Kalaharib sîsenxasigu beros dis tawa ge mî, nēti ī berosa nēpa ǁkhowa-ams di ǂâibasens, ǂharuguba !khōdana tsî omkhâisens ǂnamipe a ǀaweǁguisa daoǁgaua sîsenǂuis ai !ammâihe hâsa, !gōsase Namibiab, Botswanab tsî Suid-Afrikab !aroma.
!Auga!hūsi ǂûn ǂharugub ǂnûiǂgās, Tӧnnies Holding ApS & Co di ra ǀonǂgaihes di ǀhonkhoeb ge ǀaweǁguiga ūhâ Namibiab !nâ ǂharuguba ǁkhowa-amsa hîa ûitsamaxūna ǂā tsî ǁamaxūs !aroma aiǂhomis disa, !gōsase hāguǁgan-i tsî goma-gan-i ai ǂâisa ra ǂnûi ǂgaose.
ǀAwe-ǁguigu ge a ǁaxa-ūhe ǁnā !ās !nâ hâ !gae-auto !nari-aon tsî !narisarimā-aona ra !nari-ū !nari-aona xoamâisa daob!norasiba mûǂam mâisan tsî Namibiab !Narisarimas ǀAwemā!nans hâra tawa.
Katuturas di ǁanǂgāsaben Komites ge ǁîn di ǀarasasiba !nubusib hîa mûhesa oresa ǀkhais dib ǂnamipe ge ǂoaxa-ū, ǁnāpan ge ǁîna !ā!khōmâi-aoba mâhâ surudeb ǂnamipe oresa hōs !aroma 19 ǂKhoesaob dis ai sari hâ is khao!gâ-i noxopa xū-i tsîna ī tamase.
Dr Helena Ndumes ge a Namibia mûǀaedī-ao tsî hoa!nâ-aixase omaridi !nâ tsî !auga!hūsise ǁîs khoexa!nâ sîsenni !aroma a ǂansa. Dr Ndumes ge Namibiab National Blindness Prevention Proxramma !khōdana hâ tsî nēsis kōses ge ǁîs !nansa ǁaupexa 41 000 ǀae-aon di mûsa īǁkhā kai hâ, mûdi !hôadi !nâ-ū.
Namibiab ǂHanub ǁgui-aimaris ǂNûiǂgās (NamRA) ge ǂhanusise Opuwos !nâ ǁîs !oabade ǀhûhâsiba sī-ūbas ase berosa ǂoa ge wekheb Donertaxtsēs ai ge ǁkhowa-am tsî nēs !nâ-ū Khorixas di berosa ǂkhâ!nâ tsî ǁanǂgāsabena ǂâuǀoasasib !nâ ra !oaba ǂgao.
ǂGanamsendi !hūǁîsis ǂkhanin didi ge ai!gû rase ra ǂharo tsî ǀgaisa ǁgâiba Ministeris !Hū!nāsi ǁHōn, !Hūb !nâ ǂgâxa tsî ǂoas, !Norasasib tsî ǁAwosasib dis ai ra ǁgui, ǁnāpa gu gaxu lainga tsēkorobe ǀAeǁgams beros tawa ra hō!âhese.
â a ǂhanusi !oabade hōsa !hūǁîna nî sī!nâ ǁkhāsa ǂgaoǂgao!nâs di ǂâibasens ase tsî ǁkhāti ǂkhanuse administrasis ǂhanu-aisib disa ǂhau!nâ, ǁaeb ai tsî !ereamxasiba ra ū!nâhe ǀgaub !nâ ǁkhaeǁnâs di ǁgūbas ase di ge ǀGapi ǁNâu!gâ!khaib ǀgora!gâde Katima Mulilos ai ge ǂnāǁnâ.
!Hūb di ǁÛb Hage Geingob ge aiǂnû-aob Afrikab !Khawagas Omkhâisens ǀHûs dib, ǂGīǂgōs, ǁKhaubas tsî ǁAwosasib !Hûǁares dib ase ge mî, nē ǀhûs ra īǁkhā i as kōse !kharu ge kurib!nâ ra dītsâsa, ǀkharib !nâ ǂkhîb tsî ǁawosasiba omkhâisa.