ǀAma!khunis ǀkha hâ ǀHôakao!narib Ôa!nâ!nans (ACC) ge ǀasa dīǀgauga go ǂgâxa-ū, ǁnā sistems sîsenǀgaugu !nâ hâ !nubusina ǀariǂui tsî ǂâuǀoasase, ǁama!khunis ǀkha hâ ǀhôakao!nariba ǂhanub sîsen!khain tsî aitsama mâbasen ǂnûiǂgādi !nâ sîsenǂams !aroma.
United States !hūb ǁûb Joe Bidenni, ge ǁîb !hūb di Departements hîa LGBTI khoen di khoesi aiǂhanugu !ereamxasiga tani hâs di mâisab, Randy Berryba Namibiab ǁga US di !hūǂnûǁkhaeba-aose nî īse go ǁgaumâi.
!Hūb di ǁûb, Hage Geingob ge ǁîb a tsâǀkhāsa ai!gû ra !hū-osis ǀKhomani ǁaes khoen hîa a Damara ǂNūkhoen dis, ǁîn ǁanǂgāsabese ǁaegub !âb nēb !nâ 1930 kuriba xu ǁan hân dis xa ti gere ǁgâiǂuisen.
ǀAeǁgams, Oshakatis, Ongwedivas tsî Ondangwas hâdi di !ā!khōmaidi ge go mîǁgui ǀhûarebese ai!gûsa, ǀgaisa ǁgâiba ra mā ǁgoaǂuide oresa hōbas dītsâdi !aroma.
!Auga!hūsi !gaeǁaredi ministers, Netumbo Nandi-Ndaitwas ge 30 Gamaǀaeb 2022 dis ai ge mî, ǁnāpa ge !hūba xu ama tama ǀgaugu !naka ǂgomǂgomhe tsî !hūba xu ǂoa hâ i 31 khoede xu di 21 khoede !norasase ge oahāsa.
Duits!hūb di ǂHanub ge a ǁaxa ǁaupexa N$256 miljunsa ǀhaohaos ǀkha, Namibiab nî hui!nâ-ūse, Covid-19 ǁōs ge hā-ū ǁgoaǂuidi, !aub!ûi!gâdi tsî !narisarimas !âkha !nâde oresa hōbatsâs !aroma.
Ministeri ǂNamipeb, Haiǀgoms mû!gâs tsî !Narisarimas dib, Pohamba Shifetab ge !aub!ûi!gâdi ǁanin ai ǂgaisa go dī, in ǂgōsen ǁnāti ī mā-ams ose hâ !audi tsî ǁgauo!nâse !aub!ûi!gâdi marina sîsenūs tsîna xu. Nēs ǀkha ra !gûǁareseb minister age mîs ge, ministeris go a ǂanǂuisa tarin nē mā-ams ose ra dīhe !audi !gâb ai !khōdana-aose ǂnôasa, !aub!ûi!gâdi ǁanin tsîn a !â!nâse.
!Kharagagu mîǂgā-aon ge !haosi ǂnûs ǁanina koasa ge mā, !Haosi ǂNûs !nân ge nē kaise !onkhao hâse ra !gawaǀîhe ǂAnsa ǀGoragus ǂHanumā!âsa a !khō!gâsa. Direkteri, ǂHaitsi Xoaǁguigu Ôa!nâs ǂNûiǂgās dib, Graham Hopwoodi ge ǂoa ge wekheb Wunstaxs ai ge mî, nē ǂHanumā!âs di !khō!gâs !gâi xū-i ase !hūb di demokrasis !aroma īsa, ǁîs hîa ǂansa !hūǁîna hā-ūbas, mîǂgāba !hūb !nâ ra ī xūn !nâ ūhâsa mâbasa.
!Gameba ra ǀgora ǂgao khoen !aroma i ge !aruǀî ǂhâbasa tide, ǁîn nî ǀAeǁgams tamas ka i o Oshakatis ǀgora!gâ!khaigu ǁga ǀgoras !aroma !narisa, !gameǀgoras ǁhōn ǀgūǁae ǂam ǁnâu!gâ!khaigu !nâ !hūb a ǂhabase ǀaweǁguib !oa nî ǁnâu!gâhe amaga.
!Hū-omkhâis ministeris ge ǂgari-aon tsî ǂhabase hâ ǀhûhâsiga ge !khâikhom, ǂkhaikarin nî hâsa ǁnāpas ge ǂHīǁōs Bovin Pleuropneumonias, !nāsase sōǁōs ti a ǂansasa a khoraǂuisens khao!gâ.