Auleria Wakudumo
Okaana kamwe oka xulifa omanga ovanhu vatatu va tambulilwa meembete moshipangelo shaPuwo eshi va monika ve na omukifi woCholera.
Ouministeli wouhaku owa holola kutya otau twikile okuninga omakonakono omoule moshiningwanima eshi.
Omukulunhu mouministeli wouhaku, Penda Ithindi okwa koleka kutya ouministeli owa mona olopota yandja kombelewa youhaku kOpuwo tai holola kutya otava feekele ounona vavali veedula nhee ovo vadja meumbo limwe vena omukifi woCholera.
Ounona vati ova tambulilwa moshipangelo shaPuwo Omaandaxa oshivike sha dja ko tava ulike omadidiliko omukifi woCholera.
Ithindi okwa ti ouminsteli owa kingila ounona ava omakonakono oo a holola kutya ounona ovena ova kwatwa komukifi ooh au eta oCholera hau ifanwa oVibbrio cholera.
Ouministeli owa ti owa mona omanyamukulo aa mEtitatu nEtinhe oshivike osho tuu osho.
Nonande kwa ningwa omakonakono otete, ouministeli owa holola kutya owa teelela natango omanyamukulo okukoleka omukifi woCholera.
Metitano, otaku hokololwa vavali vomeumbo limwe navakwao vavali natango va tambulilwa meembete.
“Ava va tambulilwa meembete Etitano omwa kwatelwa okaana keedula nhano naumwe weedula 35. Ava navo ovena omadidiliko afa avakwao. Ovanaudu ava oveli kalekelwa,” Ithindi ta ti.
Ouministeli owa holola kutya ovakwanedimo inava dja mo moshilongo ile va talela po koitukulwa imwe yoshilongo ile va talelwa po.
Ovakwanedimo ava vati inava enda poivilo yomangafifi ngaashi peefya, pomadalo ile peehango.
Sheli kolelela kouministeli wouhaku opamwe nehangano louhaku mounyuni (World Health Organization), ngeenge oshilongo osha didilike oshiningwanima shimwe shomukifi woCholera, oina okutula po eendjidikila odo dina okushikulwa kovakwashiwana aveshe.
Ouminsteli wouhaku otau ningi omahongo moshiwana okushiivifila ovakwashiwana nghene vena okuliamena komukifi ou, ovanambelewa vouhaku otava indilwa opo va kale va didilika omukifi ou kuyela opo u dule okupangwa.
“Okufulukifa omeva manga ino nwa ile u longife, okukosha eenyala efimbo keshe, tuvika oikulya nokuitula ponhele ya yela, kosha oihape noingumutulu yoye,” Ithindi ta ti.
Omukifi woCholera ohau tandavele ngeenge omunhu a lya oikulya ile a nwa omeva ena omukifi ou hau eta oCholera, oVibro cholera.
Omadidiliko omukifi woCholera amwe ongaashi oshimela shomeva, onghungo, okweehama momaulu, to kanifa eenghono lomeva taa pu mo molutu.
Ovakwashiwana otava indilwa va ngungile nokulongela kumwe nouministeli ku keelelwe etandavelo lomukifi ou.
“Keshe ou ena omadidiliko omukifi ota indilwa aye koshipangelo shili popepi naye meendelelo,” Ithindi ta ti.