Omupresidente Netumbo Nandi-Ndaitwah okwa ti osha fimana ngeenge ounona tava i kofikola nokukala va amenwa molwaashi ovo ovaleli vokomongula.
Edi Nandi-Ndaitwah okwe di popya onghela pefimbo a yandja etumwalaka laye mefiku lokaana Okafrica.
Efiku eli ohali dimbulukwa omudo keshe menenedu laAfrica koilongo ya yooloka.
Neudo efiku lokaana Okafrica ola dimbulukiwa koshi yoshipalanyole “Okuninga omafaneko okuyambidida ounona noufemba wavo okudja omudo 2010.”
Omupresidente okwa ti epangelo otali twikile okukala la kwashipaleka kutya ounona otava mono omayakulo okudja kepangelo.
Okwa ti epangelo okupitila mouministeli woukashikekookanhu nonghalonawa yokaana ola longa noudiinini okutula moilonga opologalama dokuyambidida ounona moshilongo.
Okwa weda po ta ti ouministeli woukashikekookanhu nonghalonawa yokaana otau kwashilipaleke kutya kape na okaana ta ka ningilwa ominyonena ngaashi omakwatonghonga nomahepeko oukashikekookanhu.
“Ounona ohava pewa omayakulo opaunamiti, okuya kofikola nosho yo okupewa omaufemba woshilongo,” ta ti.
Okwa kumaida ovadali opo va kwashilipaleke kutya okaana keshe oka mona omhito yokuya kofikola nosho yo okupewa omayakulo opaunamiti.
“Epangelo ola tula po opologalama opo ovanafikola vaha fute vali ofikola okudja mondodo yopedu fiyo okosekundofikola. Elalakano otwa hala ovanafikola va ye kofikola,” ta ti.
Nandi-Ndaitwah okwa yelifa ta ti nonande epangelo tali lalakanene onghalo nawa younona, natango ounona onghee nga va taalela omashongo okuningilwa omahepeko omomaumbo unene tuu omakwatonghonga.
“Ohandi indile Ovanamibia a mushe noshoyo omahangano a yooloka opo mu longele kumwe okukaleka po onghalo nawa younona,” ta ti.
Omupresidente okwa ti efiku lokaana Okaafrica ola fimana mondjokonona koshilongo South Africa omo ovanafikola va kwa li va ninga omunyano tava pula va longwe momalaka omadalelwa mo.
“Ohatu va dimbuluka mefiku e li eshi kwa li tava pula oufemba wavo u fimanekwa,” ta ti.