Taimi Haihambo
Osipana youdano yokoshitukulwa shaHangwena, ya shivika nawa nedina Chula Chula oya teelelika i ka dane oudano wayo wotete woPremier League, pomukunda hau ufanwa Okamwandi popepi nOshakati moshitukulwa shaShana.
Omukwatelikomesho womauyelele wosipana yaChula Chula Jackson Da Silva okwa ti, oudano ou otau ka kala wotete woliga yopombada neudo.
“Chula Chula ota ka dana no-KK Palace mOlomakaya,” ta ti.
Okwa twikila kutya pefimbo va kala ve lipyakidila nomalengikido osho yo okudeula ovadanitanga, natango ova kala ve lipyakidila nokulanda ovadanitanga kondje yoshilongo va kale hava danene osipana. “Ovadanitanga ava twa landa, vavali ova dja koZambia, omanga vavali va dja ko-DRC. Fye natango hatu kendabala tu kufe vatano meni loshilongo,” ta ti.
Ovadanitanga ava vape opo va waimine osipana, vati ova pyokoka vo ova deuka, nove lilongekida okutambula eenghulunghedi dosipana dikulu.
Okwa twikila kutya Chula Chula oye ovanhu, vo ovanhu ovo Chula Chula. Molwekwatafano eli liwa li li pokati kaChula Chula moshiwana, vati ova hala okutameka eepoloyeka dokukala ve na ekwatafano liwa novakwashiwana, vo va tameke okukala hava dana novanhu vomomikunda.
Okwa ti omashongo koChula Chula hao naana lela a nyaa kehonga. Ashike nande ongaho vati ove lipaka mo mokudeula ovadanitanga vavo shaashi inava hala okufifa ovayambididi vavo ounye.