Uakutura Kambaekua

OPUWO- Namibiab ǀAwa!namn ǀHûs danab Kunene ǀkharib !nâb, komisares James Nderurab ge auto!nari-aon tsî ǀnū!gû-aona ge ǂgan, in ū-oasen dâu ra ǁgoe !āga !gâusa dītsâsa. Nē !khâikhoms ge ǁnā ǀkharib !nâ ge !kharu ge !nona wekhegu !nâ a ǁnā ǀgaisa ǀnanub mâsigu xa ra ǁgarihese ge hā. 

Nampas ǀkhab ge ǂoa ge wekheb di Wunstaxtsēs ai ūhâ i dî!nâǁgamǁares !nâb ge Nderuraba ge ǀgonǀgon!gao, dâu ra !āga !gâus tamas ka i o !gâusa dītsâs ra !khâihesa, nē !āb ǀgaisa ǁgamma ra ūhâ tsîs tsînan khoena ûiga ǂoa!nâ tsî auton tsîna ǁgammi xa gere tanibehe !khaisa. 

“Hoada a ǂanseb ge ǀkhariba noxopa ai!gû rase ǀgaisa ǀnanuba ra !khō!oa. Hoa auto!nari-aon tsî ǀnū!gû-aon ge ǁkhān ase nî !ûisen dâu ra !āga !gâusa. 

Nē !āgu ge kaise a ǁkhōǁkhōsa tsî hoada !aroma ǁkhōǁkhōsasiba !khōǂgā hâ amaga, tsî ta ge ǁnā-amaga nē !khâikhomsa du nî ǁnâumāsen !khaisa ra ǂgom!gâ,” tis ge ǁîb !khâikhomsa gere mî. 

!Nāsa daogu ge dâu ra !āgu xa ra !aromahese !gâusa īǁoasasib !nâ ra mâi, nēsits ga ǂaidi ǀkha a hâ tamas ka i o auto-i ǀkha a hâ xawe. 

I ǂâ hâ !gâu!nâde hoa !āgu !gâu-amdi tawa ūhâ tama hâ, ǁnā-amaga da ge hoada aibe !āgu di ǁgamgu nî ǁnoro ǁaeba nî !âu,” tib ge Nderuraba gere ǁgui!gâ. 

Ai!â ge !kharu wekheb di sâǁaeb nâ ge hâ i ǀgam āǁōra, Opuwos tsî Lekkerwaters hâra aira khao!gâb ǀkhariba hāǀaro ra āǁō-e !nuri tama hâ tib ge komisareba gere mî. 

!Āgu hîa ǀgaisa ǀnanuba !khō!oa tsî ǀkhamasase ra !khoegu ge ǂgaiǀons ai Okangwatib, Teangab, Outeb, Onunguruab tsî Otjiumuhahab hâga. 

Noxopa ra ǀarosense hâgu ge !Naniǀaus !āb tsî Omao !āgu tsîna, !gōsase Epupas tsî Onunguruas ǁaegu.