WINDHOEK – Palo ye fita fa mashumi a malalu ka babalalu (33) bao bataba babile baina-lipula mwa buatuli bwa katengo ka kuta ye ta bona za liketisa ze libelezwi ne ba konkiselizwe mwa lipula za bona la Mubulo.
Muzamaisi yo munyinyani mwa litaba za likuta (Deputy Chief Justice) Petrus Damaseb ki yanali muzamaisi wa kukonkisezwa koo, kwa mukiti o neupetahalezi kwa sibaka sa SADC Tribunal mwa Windhoek. Baatuli bao ba mashumi a malalu ka babalalu bata ngolangisa linonge ze amana ni liketisa ze libelezwi, mi ne baelelizwe ku sebeza fa linonge kabubebe kusina kukwenula mubilaeli. Damaseb na ize, baatuli ba ta amuhela ni kuteleza linonge ze swana sina kuhanelwa ku swaya kapa kuhanelwa kwa kopano ya litaba za naha hamoho cwalo ni ku teeleza ni kunyakisisa pilaelo ya kuzwiswa fa mukoloko wa liketisa. Ba taba babile mwa mayemo ao kuisa maungulo a liketisa. Ba ta kona ku kaupa likomano zeo lita kona kuba kwa teni pili liketisa lisika tateka kale, ze amana ni miinelo ya likopano za litaba za naha, babeleki ba liketisa ni zemwi ze ta talimeha kusa namalala hande kuamana ni liketisa ni zeo lita kona kubihiwa pili liketisa lisika simulula kale. Bana ba Namibia ba taitenga mwa liketisa kala 28 Ňulule ku keta mueteleli wa naha ni makwambuyu bandu ya milao.
Damaseb hape na likile ku tungulula butokwa bwa kalulo ya 165 mwa mulao wa liketisa (Electoral Act) o talusa kuli “likatulo kuamana ni litongoko ze bihiwa kwa katengo ka kuta (Tibunal Court) liswanelwa ku tumuswa pili lizazi la buketalizoho lisika fitelela kale kuzwa lipiho liamuhelwa.” “Mukonile kuitama luci lwa kusebeza ka mulao kakuya ka bupaki ni buniti bo buyalwa fa pata a mina. Nina ni sepo ye tezi ya kuli mutabe mutiyezi fa misebezi ka ku saaba ni silibonda, kuba ni buniti mwa kueza misebezi ya mina ya kambekelo,”a talusa. Nonge ifi kapa ifi kuamana ni kuketa mueteleli wa naha i tatalimwa feela ki kuta ye feleleza ya naha (Supreme Court). “Ku konkisezwa ko mukonkiselizwe, taluso ki kuli buatuli mwa mulao wa liketisa bu simuluzi,”kwa bulela Damaseb. ”Kuta ya liketisa i taba mutai mwa kuta ye pahami (High Court) mi i tateeleza linonge ni kupundulula zeo lizwa kwa katengo ka kuta ye tabona za liketisa ni likatulo zeo lifitisizwe ki Electoral Commission ya Namibia,” Damaseb a zwelapili ku talusa.”
“Nina ni tumelo ya kuli muka sebeza ka tokomelo mwa misebezi ya mina ni kuli amuna kukwenula mubilaeli musika teeleza kwa pilaelo ya hae mwa nako ye kuswani,” a talusa.