ONGWEDIVA – Omupopiliko wokakomisi komahoololo koElectoral Commission of Namibia (ECN) De Wet Siluka okwa ti otaku ka ningwa omahoololo a wedwa po koikandjohoololo itano molwookansela ovo va ya keumbo lomutumba wopashiwana.
Okwa koleka ta ti omahoololo otaa ka kala ko momafiku 18 Juni neudo.
Siluka okwa ti omafiku 10 fiyo 12 Apilili oshiwana otashi ka pitikwa opo shi ke lishangife oukalata vokuhoolola koindjohoololo ngaashi Kamanjab, Sesfotein, Kabbe South, Grootfontein nosho yo Otjiwarongo.
Okwa weda po ta ti koikandjohoololo taku ka ningwa omahoololo oi li koitukulwa ngaashi Kunene, Zambezi nOtjozondjupa.
Ookansela va fiya po oilonga ovo Nico Somaeb kwa li ta wilike oshikandjohoololo shaKamanjab, Hendrick Gaobaeb kwa li woshikandjohoololo shaSesfontein, Marlayn Mbakera a dja kOtjiwarongo, Elder Filipe a dja koGrootfontein naJohn Likando a dja koKabbe South.
Siluka okwa ti omafiku 23 Mai, ECN ota ka pula eengudu dopapolitika opo di ka yandje omadina ovanhu vavo ovo tava ka kufa ombinga momahoololo.
“Ongudu keshe yopapolitika oi na oufemba okuyandja edina lomunhu ta ka kufa ombinga momahoololo oukansela,” ta ti.
Okwa yelifa ta ti Namibia oku na okatendo ta ka ti kutya ngeenge kansela woshikandjohoololo okwa xulifa ile a fiya po oilonga ohapa ningwa omahoololo a wedwa po.
Siluka okwa pula oshiwana opo shi longife omhito ei oku ke lishangifa oukalata wokuhoolola molwaashi osha fimana ngeenge omunhu ta kufa ombinga okuhoolola omuleli waye.
“Ovanhu va kanifa oukalata vokuhoolola navo ova manguluka opo ve ke lishangife oukalata vokuhoolola,” ta ti.
Okwa weda po ta ti omunhu ou ta ka wanifa eedula 18 momwedi Juni pefimbo taku ka ningwa omahoololo okwa opumbwa okulishangifa okakalata.
“Ovanhu ashike hava di moikandjohoololo oyo tai ningwa omahoololo va pitikwa oku ka hoolola,” ta ti.
Okwa pula oshiwana opo shi liufe komilandu da tulwa po ko-ECN nokukala sha twalela omikanda domondjila okuya koukefa vokuhoololela.