Matheus David 

Windhoek – Mayola woshilando shaWindhoek Ndeshihafela Larandja okwa tumbaleka eyokomesho leepoloyeka dokuandjaneka eealalama domwifi momalukanda inaa longekidwa, osho te shi ufana onghatu ya kwata moiti mokuxupifa eemwenyo dovanhu noku va amena komundilo. 

MoNamibia, omundilo ou li natango oupyakadi kovanhu nomaliko avo. Omushangwa womo2024 otau ulike ookadimamundilo va kwafela momaupyakadi omindilo e li 2000, omo eepelesenda 75 omaumbo 200 oo a pya komundilo nokwa hanaunwa po filufilu. 

Pepatululo loshivike shopaiwana mokulwifa omundilo (International Fire Safety Week 2025), Larandja okwa ti oualalama vokukonakona omwifi ve fike lwopo200 ova tulwa nale momalukanda inaa longekidwa. Oshimaliwa sha longifwa okweeta po oilongifo oyo, osha dja moiyandjomwa yodula ya ka dilongela. 

Okaalalama kamwe kokulopota omwifi meumbo otaka dulu okushunifa pedu omafyo taa etwa komundilo neepelesenda 50. Okwa xwaxwameka yoo ovanhu ve lilonge omikalo dokulixupifa “efa, shuna po, na faduka po”. nokweeta po omikalo dokuxupifa eefamili davo. 

Larandja okwa handja yo olupandu komudingonoko nokookadimamundilo eshi va shonopaleka omwaalu weelopota domundilo kudja po 705 okuya po 569 momukokomoko wodula ya ka dilongela. 

Mayola okwa didilika ovanhu ava ve li komalukalwa inaa longekidwa tava mono oixuna unene, shaashi eelopota domundilo nomaumbo a pya dihapu meenhele davo. 

Oshilandopangelo Windhoek osha tokola nokutwikila okuandjaneka omadeulo nokukonga oilwifo yomundilo i li xwepo opo va kaleke po keshe omudingonoko u na eameno. 

-matheusshitongenidavid@gmail.com