OHANGWENA- Ngoloneya woshitukulwa shaHangwena Kadiva Hamutumwa okwa ti eemilliona 35 oda tulwa poshitaafula okutunga oshiputudilo shaEenhana NUST. 

Okwa ti oilonga yokutunga otai ka tameka omafiku aa shaashi aishe oya tulwa nale peenhele. 

Okwa weda po elelo lodoolopa yaEenhana ola yandja nale onhele yedu opo ta pa tungwa oshiputudilo eshi. 

Ngoloneya edi okwe popya mexuliloshivike pefimbo kwa li ta lombwele Omupresidente Netumbo Nandi-Ndaitwah kombinga yeepoloyeka odo da tulwa moilonga moshitukulwa shaye. 

Efiku olo Omupresidente okwa li a talela po Omupresidente mukulu Hifikepunye Pohamba keumbo laye kOnghudi. 

Nandi-Ndaitwah okwa li a hafa okuunda onghundana ei kungoloneya eshi ta longo nondjungu. 

Mopaife ngaha NUST oha longifa omatungo eli pomukunda Eembaxu omo ha mu longelwa ovalihongi ashike ngeenge oshiputudilo osha tungwa ovanhu ota kaya kodoolopa yaEenhana. Hamutumwa okwa ti oshiputudilo eshi otashi tungwa shi li pamufika woshinena. 

Okwa yelifa ta ti moshitukulwa shaye paife omuna oiputudilo yopombada ngaashi IUM, NUST osho yo endiki lopaungoba loVTC. 

“Oiputudilo ei otai dana onghandangala ya kula moshitukulwa shetu shaashi otai yandje ounongo kovanyasha. 

Onda pandula oilonga tai longwa koiputudilo ei,” ta ti . Ngoloneya okwa lombwela Omupresidente ta ti ombelewa yaye otai twikile okuyandjeneka omayakulo koshiwana ngaaashi omeva, eepate, oupangelo osho yo okutunga eefikola. “Ombelewa yange otai twikile okulongela kumwe nouministeli wounamapya okundula po omukundu wenota,” ta ti. 

Okwa weda po ta ti ota kwashipaleke kutya ovanhu komikunda otava nu omeva a yela. Okwa ti koshikandjohoololo shaPembe otaku ka tungwa ofikola ipe omanga moshikandjohoololo shaMulonga ota mu ka tungwa osekundofikola ipe. 

Kombinga yeepate, ngoloneya okwa ti ombelewa yaye otai shi endifa nawa okulonga eepate moshitukulwa. 

“Opo ashike twa patulula opate ipe ya tungwa komukunda Oshuuli-Omulundo moshikandjohoololo shaShikunde,” ta ti. 

Hamutumwa okwa ti oilonga yokulongulula opate yandje pOndobe fiyo Eenhana oya tameka. 

“Natango otwa tulwa eenhopa hadi kaama kombada yomeva komukunda Shingunguma opo di longifwe kovanafikola vaye keetundi,” ta ti. 

fhamalwa@nepc.com.na