Omupeviminista gwiilonga niiyenditho Hans Haikali okwa pula enkondopeko pokati koongalashe dhepangelo osho wo ehangano lyina sha niiputudhilo yopaungomba Namibia Training Authority (NTA). 

Haikali okwa popi ngaaka konima a li a talele po ongalashe yepangelo kOndangwa Omaandaha. 

“Onda hala oongalashe dhepangelo dhi longele kumwe nehangano lyoNTA nelalakano lyokueta po oompito dhiilonga mokati kaanyasha”ta ti ngaaka. 

Haikali okwa popi esimano lyokunkondopaleka ekwatathano ndyoka opo ku kalwe ta ku kuthwa aalongwa miiputundhilo yopaungomba ya mone omadheulo okupitila moongalashe dhepangelo. 

Ta ti, shoka otashi ka gandja ompito ombwaanawa noku longekidhila aanyasha iilonga opo ya vule okuilongela yo yene. 

Minista okwa ti, opo gumwe a kale a pyokoka okuna okukala a dheuka nawa, naashoka otashi ningwa ashike uuna ya mona oompito dhomadheulo okupitila mooprogalama dhoka. 

“Oongalashe dhepangelo nadhi kale tadhi gandja iilonga kaanyasha ya za kiiputudhi yopongaumba oshoka ndyoka oyo ashike ompito taya vulu okupitila opo ya nkondopaleko wo oontseyo dhawo,” ta indele ngaaka. 

Haikali okwa ti epangelo onkene tali tsikile okuyambidhidha aalongwa yeli kiiputudhilo nokuya pa oompito dhokuidheula okuya longekidha onakuyiwa osho wo ekandulepo lyiilonga. 

Martin Ndeunyema ngoka iilongele okupangela iihauto koVTC koRundu okwa ti okwa mana eyilongo lye omimvo omugoyi dha pita ihe sigo onena ina mona iilonga. 

“Nonando handi mono ootendela mpeya naampeya ondina uupyakandhi wiilongitho osho wo ehala,” ta popi ngaaka. 

Ndeunyema okwa ti, oha uvu ashike epangelo hali gandja oomayambidhidho goshimaliwa nenge giilongitho, ihe nando a ninge omayindilo iha piti mo. 

Ta pula kutya ekandule po lokwaana iilonga ndyoka ta li popi wa olini ngele oohandimwe ashike haya yambidhidhwa. 

Ongundu tayi pangele moshilongo oya uvaneke okuhwepopaleka onkalo yaanyasha moshilongo okupitila mekandulepo lyokwaana iilonga, ya kwashipaleke okugandja omayambidhidho ga yooloka. 

-vkaapanda@nepc.com.na