Okwa lopotwa ongudu yeendjaba de li teyela mexuliloshivike moshikandjohoololo shaTamanzi kOmusati omo vati tadi hanauna po omaumbo ovanhu osho yo omaanda oilya. Edi oda popiwa kukansela woshikandjohoololo shaTamanzi Johannes Iiyambo ta ti eendjaba oda nyika oshiponga noshiwana osha tila paife. Okwa yelifa ta ti fiyo opapa ina pa lopotwa omunhu a dipawa ile a monifwa oshiponga kondjaba.
“Eendjaba oda dilila koshikunino shoinamwenyo kEtosha. Otadi ende neehamba da yooloka komudingonoko Amarika,” ta ti. Iiyambo okwa ti ovakulupe novanafikola ngeenge tava di kofikola ove na omhito yokuponokelwa keendjaba. Kansela okwa kumaida oshiwana opo shi lopotele ombelewa yaye ile ovanambelewa hava longo kouministeli womidingonoko ngeenge sha mono eendjaba. Eshi a kwatafana naKundana omumbelelwa ta longele koshitukulwa shaMusati mouministeli womidingonoko, eefukuka novapashioni, Loveness Ndeiweda okwa ti osho shi li eendjaba oda lopotwa komikunda da yooloka mOmusati. “Eendjaba ota di kongongo oikulya ngaashi omanuwa oshoyo omeva okunwa,” ta ti.
Okwa yelifa ta ti itashi kutya ngeenge eendjaba tadi ende momikunda onde ya okudipaa ovanhu ashike ota di kongongo ouxupilo. “Oshiwana ina shi pumbwa okudenga ile okutaa eendjaba shaashi osha nyika oshiponga,” a kumaida.
Okwa lombwela oshiwana opo shi xulife po kukala tashi ende oufiku ngeenge tava di keendingosho shaashi ngeenge kwa laula omunhu ita dulu okumonena po ondjamba diva.“Otwa didilika eendjaba di hole oku ya meenduda ngeenge mwa tulwa omanuwa ashike ita di ponokele ovanhu,” ta ti. Okwa ti ondjaba ohai ya ashike monduda mwa tulwa omanuwa ndele tai li nokushuna.
“Ashike ngeenge omunhu okwa kendabala okudenga ondjaba otashi eta i kale ya nyemata ndele tai ponokele ovanhu osho shi li sha nyika oshiponga,” ta ti.