Okwa lopotwa eendjaba di fike po15 da ponokela moshikandjohololo Mukwe moshitukulwa shaKavango-Uushilo.
Eendjaba edi oda ningila omapya oushada wokuteya po oikunomwa ngaashi omahangu nomapungu nokuhanauna po eedalate domakove avo.
Kansela woshikandjohoololo Mukwe, Damian Maghambayi, meenghandafana odo a ninga naKundana okwa hokolola kutya eendjaba edi oda kala nokulopotwa moshikandjohololo shaye okudja omudo wa dja ko fiyo oneudo.
Maghambayi okwa ti ovakalimo vomoshikandjohololo shaye otava mono oixuna unene keendjaba edi, unene tuu eshi oikunomwa yavo tai longelwa oushada efiku nefiku. Okwa ti omikunda dili omulongo odi li tadi ningilwa oushada keendjamba.
“Keshe efiku ombelewa yange ohai mono eelopota tadi di kovanhu tava nyenyeta omapya avo a longelwa oushada koifitukuti ei,” Maighambayi ta ti.
Kansela okwa hokolola kutya eendjaba hado adike odo di li eshongo linene moshikandjohoololo shaye, ashike oshiwana shaye oshi na oumbada weengadu neenghoshi edi di li koshiunnda shoifitukuti koBwabwata National Park popepi noshiwana.
Maghambayi okwa ti ombelewa yaye oya shiivifila ombelewa yomisteli womidingonoko nomatelel po ei i li moshitukulwa shaye nghee oshiwana tashi mono oixuna koifikuti ei.
“Oshiwana osha lulilwa unene keendjaba edi, tashi lili efiku nefiku. Vamwe otave lipula kutya otava ka lya peni neudo shaashi oikunomwa yavo kai po vali oya dedaulwashi keendjaba,” kansela ta ti.
Kansela okwa ti ominista yomidingonoko oya udanekela ombelewa yave pamwe novakwashiwana kutya otai ka longa nelitulemo opo oku kwashipalekwe kutya eendjamba edi ita dipumumo vali moshiunda dasho.
Onghee okwa twa oshiwana shomoshikandjohololo shaye kutya nashi kale shi na omukumo kutya omukundu ou otau ka kandulwa po meendelelo. Yee ta yelifa kutya ouministeli owa didilika oushada aushe ou wa longwa keendjaba. Onghee aishe otai ka tulwa peenhele kepangelo ngaashi tashi dulika.