Kansela woshikandjohoololo shaNgenga Mathew Shikongo okwa ti ovanafikola novahongifikola ove li meshongo linene eshi eendjila dokuya keefikola diyadi omeva paife.
Shikongo okwa ti oivike itatu ya pita odula oya loka unene, osho osha etifa eendjila edi hadi ende ovanafikola novahongifikola di kale nomeva ahapu paife ottava i kofikola noudjuu.
Kansela okwa ti eefikola ngaashi Elakalapwa Primary School, John Shaetanodi Combined School, Immanuel Wahengo nEngungumano odo dimwe kwa didilikwa di na oupate hava talama omeva.
Okwa ti pefimbo eli ounona vofikola ve li meendodo dopedu ohava kala va ninga oihakanwa yokuwila momeva eshi hava kala tava kendabala okutaulaka omeva ale.
Shikongo okwa hokolola ta ti ovahongifikola vokofikola Onghala Combined School ihava longifa vali eetuwa davo ngeenge tava i koilonga shaashi ondjila ei hava longifa oi hadi omeva paife.
“Ovahongifikola ngeenge tava i koilonga ohava fiye eetuwa davo poundingosho pOnghala ndele tava ende keemhadi,” Shikongo ta ti.
Kansela okwa kunghilila ovadali opo va kale tava findikile ounona vavo okuya kofikola noku ke va tala ko.
“Ovadali novahongifikola nava kale tava popi nounona opo vaha danene omeva ngeenge tava di keefikola,” Shikongo ta ti.
Kansela woshikandjhoololo shaNgela Elikan Hainghumbi naye okwa lombwela Kundana ta ti moshikandjohoololo shaye namo omu na oupyakadi weendjila da uka keefikoa nokoupangelo da yelulwa novakwashiwana paife tava longo noudjuu.
Nestory Moses omukalimo womomukunda Ongha, yee oku li yoo vali omukulunhuwiliki welyenge lokulwifa oimbuluma loMen and Women Network moshitukulwa shaHangwena okwa hokololela Kundana ta ti keshe efiku ohava findikile ounona vavo ngeenge tava i keefikola shaashi ounona ihava dulu okutauluka omeva.
“Inatu hala ounona vetu va fya omeva ile va kale ve na oinyangadalwa yavo yofikola i li konima onghee ohatu ningi eenghendabala doku va twala noku ke va tala ko kofikola,” Moses ta ti.
Okwa hokolola ta ti ovahangifikola hava di mOngha hava ka longa eefikola komikunda di li kondje yOngha navo ove li meshongo linene leendjila di hadi omeva.
Okwa ti unene tuu ondjila ya uka kofikola kEenghushe Primary School oya didilikwa i li koshi yomeva shaashi ihai longifwa vali.
Okwa weda po ta ti ounona hava di novakulupe ohava faula keetundi shaashi kepe na ou te va findikile okuya kofikola.
– fhamalwa@nepc.com.na