OSHIKANGO – Opolifi yaNamibia naAngola otai twikile okulongela kumwe okulwifa oumbudi wokuvaka eetuwa.
Omaandaxa, eetuwa nhee odo kwa li da vakwa moNamibia oda pewa oovene konima eshi da hangika da holekwa moAngola.
Eetuwa edi okwa li da vakwa moshitukulwa ShaHangwena nOshana.
Omupopiliko wopolifi moshitukulwa shaShana Chief Inspector Thomas Aiyambo okwa ti eetuwa oda vakwa moNamibia ndele tadi ka holekwa moAngola.
Okwa kumaida oshiwana opo shi longele kumwe nopolifi okulwifa oumbudi unene tuu weetuwa.
“Opolifi ngeenge ya lopotelwa otuwa ya vakwa po ohai shivifile oshiwana koradio nelalakano lokukwafela okuyandja ouyelele,” ta ti.
Okwa pandula oshiwana eshi tashi longele kumwe nopolifi okuyandja ouyelele shaashi otashi kwafele opolifi okukandeka oimbuluma.
Oovene deetuwa odo da li da vakwa po ova hafa nokupandula opolifi yaAngola eshi ya longa noudiinini okukwata ko eetuwa davo.
Kleopas Hamutenya okwa ti opolifi otai longo oshilonga sha fimana okukandeka oimbuluma.
“Onda pandula eshi otuwa yange ya monika. Natu fimanekeni oilonga tai longwa kopolifi,” ta ti.
Okwa ti okwa ponokelwa kookalyamupombo komukunda Omusheshe u li popepi nOngwediva neudo.
“Ova manga nge neengodi ndele tava faduka po notuwa yange,” ta hokolola.
Hamutenya okwa kumaida oshiwana opo shi kotokele eetuwa davo molwaashi ookalyamopombo ovahapu.