Chief Inspector wopolifi Christina van-Dunem Da Fonsech okwa ti ehandukilo lokulundilila omunhu oulodi olo eedula nhano modolongo ile oifuta yoshimaliwa shonhumba.
Da Fonsech edi okwe di popya pefimbo kwa li a ninga omutumba neendudu, ovafita veengeleka da yooloka noshoyo oovene vomikunda.
Omutumba oo wa li ko mexuliloshivike kOutapi moshitukulwa shaMusati, Da Fonsech kwa li ta yandje ehongo nouyelele nghene eendudu neengeleka di na okulandula omilandu da tulwa po koveta.
Okwa ti ovanhu 27 ove limangeleka konima eshi va lundilwa kutya ovalodi onghee osha nyika oshiponga ngeenge omunhu ta lundilile mukwao oulodi.
Okwa ti eendudu novafita unene tuu veengeleka doshiveva otava eta edundakano moshiwana shaashi ovanhu otava lundilafana
“Omunhu ngeenge a ya keendudu ile kongeleka oha lombwelwa edina lomunhu ou te mu li nokudja opo ohashi eta outondwe pokati kovanhu unene tuu meefamili, koilonga nopomaushiinda,” ta ti.
Okwa kumaida eendudu, ovafita opo va xulife po okulombwela ovanhu kutya otava liwa kolyelye molwaashi osha puka okulundila omunhu.
“Ngeenge omunhu a lundilwa oha kala ehe na ombili omanga vamwe iha va kala vali va manguluka ngeenge tava ende mokati kovanhu shaashi oha kala a tila oku ulikwa kutya ota li ovanhu,” Da Fonsech ta ti.
Da Fonsech okwa kumaida yoo vali ovafita opo xulife po oku ya moixulo nounona vofikola noshoyo novakulukadi vovanhu va hombolwa.
“Ovanafikola ina va patelwa vali meengeleka pefimbo lomakonakono,” ta weda po.
Okwa ti eendudu novafita vopaife ove li ninga ovanangeshefa voku tula ovanhu mokatoo noku kengelela ovanhu oshimaliwa shavo eshi hava kala tava popi oipupulu kutya ovanhu otava liwa koolyelye noshoyo okulombwela ovanhu kutya ove na omaudu.
“Ita nditi kutya momikunda ina mu kala eendudu molwashi eendudu odi li oshitopolwa shopamufyuululwakalo. Onda hala eendudu di kale ita di pukifa oshiwana momikunda,” ta ti.
Lopokati opo, Da Fonsech okwa kumaida oovene vomikunda opo va kwashipaleke kutya eendudu oda shangifwa kutya odi li nga pi mwakwatelwa omikifi edi hadi pange.
“Mwene vomukunda oku na oufemba wokupata ongeleka ngeenge otai pukifa oshiwana momukunda ile a tataye mo ondudu tai pukifa oshiwana,” ta ti.