Opolisi moshitopolwa shaMusati onkene tayi tsikile okulopotelwa omakwato koonkondo, nuunene otaga ningilwa aanona aashona.
Mehuliloshiwike omwa lopotwa aanona yomimvo 9, 13, 14 oshowo omukuluntu gumwe, ya kwatwa koonkondo.
Omugandji gomauyelele gwopolisi moshitopolwa shaMusati Moses Simaho okwa ti iiningwanima mbyoka ayihe oya holoka mehuliloshiwike.
Ta ti, omakwato koonkondo ngoka, oga ningwa kaantu ye shiwike oshowo kaaniilonga yomomagumbo oshowo aapambele. Simaho ta ti, aafekelwa ayehe mboka yane, gumwe ashike gwomuyo a mangwa po kopolisi.
Ta ti, oshipotha shokanona komimvo 9 osha patululwa ashike omasiku ga zi ko, sho anuwa ka kwatwa koonkondo komumwayinagona gomimvo 17.
Otaku hokololwa kutya oshiningwanima shoka okwa li sha holoka momasiku inaaga shiwika momwedhi gwaMei nuumvo, momukunda Okando. Omumati ngoka ta fekelelwa oshinima shika, ina mangwa po, ihe omakonakono gopolisi oge li metifa.
Natango moshiningwanima shimwe, okanona komimvo 13 oka kwatwa koonkondo kOmuangola, omuniilonga gwomimvo 20.
Simaho okwa ti, oshiningwanima shoka osha holoka momukunda Ondatsila moshitopolwa shaMusati.
Ta hokolola kutya okanona hoka okwa li ka kwatwa koonkondo sho kwa li taka ende mondjila okuya kegumbo.
Otaku hokololwa kutya omulumentu ngoka anuwa okwa li e ka kwatele oonyala konima, eteka kwata koonkondo.
Omufekelwa okwa mangwa po kopolisi.
Ta gwedha po kutya okanona koka kandhona komimvo 14 okakwatwa koonkondo komulumentu eshiwike, ngoka e li metifa lyokukamangwa po.
Simaho ta ti, oshiningwanima shoka osha holoka momukunda Onamulunga momundhingoloko gOutapi.
Natango mehuliloshiwike omukiintu gomimvo 25 okwa patulula oshipotha shekwatokoonkondo.
Oshinigwanima shoka osha holoka momukunda Oneeya.
Otaku hokololwa kutya omulumentu ngoka e shiwike komukiintu ngoka, okwa li a e mu mbandameke, kutya ote mu ndhenge ngele okwa kugu, omanga ta longo iilonga ye.
– vkaapanda@nepc.com.na