Auleria Wakudumo
Elelo lodoolopa yaNgwediva ola kunghilila ovakalimo vomikunda di li popepi nodoolopa opo va idilile oimuna yavo vo ve i kaleke kokule nodoolopa.
Omupopiliko wodoolopa yaNgwediva, Ottilie Shingenge okwa holola kutya oimuna inai pitikwa okukala ile okulifwa modoolopa koveta yomalelodoolopa.
“Eshi oshi li koshi yokatendo kokukeelela oimuna meedoolopa haka ifanwa Animal Pound Regulations, oka ti-23 komomudo 1992,” Shingenge ta ti.
Shingenge okwa weda po kutya oimuna otai dulu okunyonauna omaliko ovakalimo ngaashi omaumbo, oimeno naikwao ya wedwa po.
“Oimuna otai dulu yo okueta oiponga. Kakele kaashi, oimuna modoolopa ohai shundula nokushunifa efano lodoolopa pedu kovakalimo novatalelipo naavo ve na ohokwe okutota eengeshefa davo modoolopa,” Shingenge ta ti.
Ovakwashiwana otava indilwa va tonatele oimuna yavo opo iha idililwe koshiunda shelelo lodoolopa osho tashi ka etifa va futifwe.
Meenghundafana naKundana, ovanaimuna vomomikunda da dingilila odoolopa yaNgwediva ova holola kutya ohashi kala shidjuu okutonatela oimuna ngeenge tava lifa momakango oo e li popepi nodoolopa.
Mateus Ngenoveno omukalimo womomukunda Okahenge nomutonateli woimuna okwa holola ta ti oha shingi oimuna yavo opo a ka life kekango kEhenye kOshakati.
“Ohandi shingi oimuna kEhenye opo ashike i kale ya manguluka okulinyenga eshi hai lifa. Peumbo ito lifa po noupu shaashi kape na oulifilo wa wana. Ohandi kala yo nda tila okuefela oimuna modoolopa shaashi elelo lodoolopa otali dulu okukwata ko oimuna yetu, ”Ngenoveno ta ti.
Ngenoveno okwa ti ohava futifwa N$100 mongobe ngeenge oimuna ya kwatwa ko ndele tai idililwa koshiunda shelelo lodoolopa yaNgwediva.
Omukalimo womOmatando 2 okwa holola ta ti nonande exumokomesho la fimana nola pumbiwa moshiwana, elelo lodoolopa nali tale ovanaimuna shaashi oli li koshi yedu lokomikunda.
“Ovakwashiwana vahapu ova landifa po omadu opo elelo lodoolopa li dule okuxuma komesho. Eshi ohashi kala shidjuu kufye ava twa fyaala po shaashi oulifilo wa ninga odoolopa paife,” ta ti.
Odjonghundana oya shivifila Kundana kutya oimuna inai pitikwa okulifwa yo popepi nopate nova pewa eemeta 500.
Nonande paife tava kondekele oimuna yavo momakove, okwa ti ohashi kala shidjuu unene pefimbo lokwenye eshi kuhena omwiidi.
Ovakwashiwana vamwe ova indila elelo lodoolopa yaNgwediva opo li kwashilipaleke kutya odoolopa oya yela nomwiidi aushe owa kunghulwa mo.
Eshi ovakwashiwana ova ti otashi kwafele okukaleka oimuna kokule shaashi vati ohai kala ya hokwa ko molwoulifilo oo uli mo.
“Oimuna ohai hokwa poima pe na omwiidi wa wana, onghene ngeenge modoolopa omu na omwiidi ohashi kala shidjuu okukelela oimuna efimbo,”.