Auleria Wakudumo
Elelo loshitukulwa shaShana ola yandja oN$800 000, ya nhuninwa okutunga omaumbo 10 ovakwashiwana ovo vena oyuuyemo ili pedu.
Elelo lodoolopa otali ka tunga omaumbo aa melongelokumwe noprograma yokutunga omaumbo hai ifanwa oBuild-Together (BTP).
Omaumbo otaa ka tunga kolukanda Eheke moshikandjohoololo shokomikunda mOndangwa.
Omupopiliko welelo loshitukulwa shaShana Nuusita Ashipala okwa holola kutya eshi oshili shimwe shomwaayo tai lalakanenwa kelelo loshitukulwa okukwashilipaleka kutya ovakwashiwana vavo ovena omaumbo ongushu nokuvakwatela mo meyambule po lomudingonoko.
Eshi otashi tu yo kumwe nelalakano lakula lepangelo okuyandja edu la longwa nolina ombilixa kOvanamibia aveshe.
Ashipala okwa holola yo kutya fiyo okeluwa eli, elelo loshitukulwa ola yandja eenhele domalukalwa dili 209, neenhele dokungeshefela dili 21 momudingonoko Eheke. Eshi osha patululila omhito yexumokomesho neyambule po ponhele ei.
“Oprograma yoBuild-Together otai twikile okukandula po omhumbwe yomaumbo moshilongo, unene omaumbo ovanhu ovo vena oyuuyemo ili pedu. Fye onga epangelo lopokati, otu udite etumba okukufa ombinga mokuyandja omaumbo kovakwashiwana vetu, oundjuu oo wa taalela vahapu moshilongo,” Ashipala ta holola ngaho.
Ashipala okwa indila ovakalimo ovo va pewa nale omalukalwa avo opo va hovele okutunga omatungu avo.
“Ohatu indile ovakwashiwana aveshe ovo va pewa eenhele domaumbo opo va hovela okutunga omaumbo avo opo va endelelife exumokomesho momudingonoko Eheke,” ta ti ngaho.
Elelo loshitukulwa shaShana otali ningi omalongekido a xuuninwa omanga oprograma yokutunga omaumbo inai hovela.
Elelo otali twikile okukwafa ovakwashiwana moshitukulwa shaShana nokukwashilipaleka kutya eendjodi dovakwashiwana dokukala vena omaumbo oda twa, tave shi pondola nokukala tava yandje omaumbo koolimwe noolimwe.