Charles Ndeumane
ONGWEDIVA – Ehangano lyoNational Road Safety Council otali longele kumwe nuumisteli welongo, uunkulungu nomithigululwakalo opo elongo lyegameno lyomoopate lyi tameke okulongwa moosikola okupitila miilongwa ya yooloka mbyoka hayi longwa moosikola.
Ongomukalo gwokukeelela nokushunitha pevi iiponga yomoondjila ngaashi naanaa ondjodhithaneko yoshilongo tayi lalakanene okuhulitha po omaso giiponga yomoondjila, ehangano lyegameno lyomoopate lyoNational Road Safety Council otali longele kumwe nuuministeli welongo oshowo oshiputudhilo shopashigwana shehumokomeho lyelongo (NIED) opo elongo lyegameno lyomoopate lyi lumbakanithwe miilongwa yimwepo yosikola okuza mondondo nola sigo ondondo 12.
Etotepo lyelongo lyegameno lyomoopate moosikola olya ndjandjukununwa komunambelewa a za kuuministeli welongo Haroldt //Geiseb mesiku lyotango lyoshigongiilonga oshitimugoyi shoNational Road Safety Council shoka sha ningilwa mOngwediva mEtitatu lyomasiku 10 Juuli 2024. “Aalongi otaya ka dheulwa nkene yena oku lumbakanitha elongo lyegameno lyomoopate miilongwa ngaashi Oshiingilisa, Omwaalu, Natural Science, oshowo oGeography.
Omunambelewa gwoshiputudhilo shoNIED Bertha Haimbodi okwa ti oshikondo shelongo moshiputudhilo shoNIED otashi longele kumwe noshikondo shomapekapeko shehangano lyoNational Road Safety Council opo ya kwashilipaleke kutya elongo lyegameno lyomoopate otali lumbakanithwa miilongwa yosikola nuupu opo kaashi ete engwangwano maalongwa.