Ami omuini otja tje tje rira moruveze rwandje omuini, hapo oomuano omundu mbo tjo tanaura embo. Embo oritjavari ra Mumzy Chukwu tji ya ri 13 komueze mbwi nda tjiukisirwe mOtjomuise.
Chukwu mu ma serekarere ouyenda we womuinyo na mbya tuurungira nokuyatakaṋa nongondjero ye yokuveruka momuinyo kutja ma rire eye omuini otja tja sokurira ame riyaruka mourizemburuka. Embo ndi mari kongorere embo re etenga nda tjanga rena: Kape noruveze rokumorosa oruveze.
Ovimbumba novimbumba vyovanangamburiro, ovaungure va pu na Chukwu, ovatjiwasane novazamumwe Oroviungura ndo, tji ya ri 13 komueze mbwi va woronganene metuwo rovitjitwa rotjimbumba tjomanyando inga ngu kuza ongorfa okurira ozohatoi zomatjiukisiro wembo ndi. Oro nda tjiukisirwe i yOmbitjopa Ndjavera. Motjiungura tji tja kayendisirwe i Nangula Geingosa, omuatje omukazona otjiveri tjOperesindenda oitjatatu ya Namibia, omuyaruke Hage Geingoba.
Potjitjitwa Kazeire Stephen Raurau pari omuhungire omuṋangwa omuyenda wapeke. Omuhungire warwe yari omutanda Jeanne-Danae Januarie eye ngwari motjirindinoko otjomangeha neyuva rimwe meṋe yomuronga e rihungirire na hungire ku na Omuute kutja eyuva ndo oore esenina okupepa omangeha na zuvirwa. Tjandje ondjira indjo ma kayenda onḓorozu kaparukaze nganda wina ndje mu pa ouṱumbapare aeri omuatje uriri nguri mosikore. Aye a kayenda motjimbumba tjovanatje imba ookavenamatwi. Ndino ndi eye wa toora ondjira yarwe me ri otjihorera komitanda omikwao eye mbye kondjisa okuzuvarisa ondjira ndji ri yo nouhatoi we wina okutuurungira motjimbumba tjomizumbi vyongamburiro.
Omambo nga yeri mozondi mbari. Zokutumbura nokupanga ovandu mominyo kutja omombepo yongamburiro poo oyo ku ve honga ondjira ndja sere okurira yomomuinyo wakangamwa omundu. Tjinga ingo mutjange waro aeri omuzuvarise na wina omurasire wovandu ondjira ndji ri yo mbu ku za ovatumbure vovandu momuinyo kutja ve tanauire ominyo vyawo mondjira ndji ri yo ndji hi nokuvetwara kombandjarero. Poo okuvehomona monḓomo yombandjarero.
Meriam Muzy Chukwu poo Mooṱu pendje na nai tja uta okutjanga omambo, we kurura mOkatutura. Kombunda a humbwa nekurisiwa i yomukazendu wa Zambia omukambure, Elinaty Zulu na kupwa i yomurumendu omukwatera wa Nigeria. U nondjiviro moveta youre wozombura ape o-15. Embo re mari vazewa pu Mumzy poo 0817684463.