Epangelo ota li pandulwa molwa elitulemo lalo mokuyambidida omuhoko wovatilyane keembinga adishe doshilongo. 

Edi oda popiwa kOmupedu Minista mombelewa yomupedu president Moses //Khumub. 

//Khumub okwa ti epangelo ola kendabala okuyandja omaufemba kovayelele, ouhaku welixwa po oshoyo ehongo mokati kavo. 

Edi okwe di holola pefimbo ali a ka kalela po oshilongo komutumba uti25 woiwana yahangana ko New York shaAmerica una sha nomuhoko wovatilyane. 

“Ngeenge ha tu popi oshinakuwanifa shoku kwafa ovanhu vomuhoko wovatilyane, otwa kwatela mo ava hatuti o San, Ovatue oshoyo Ovatjimba,” ta holola ngaho. 

Okwa yelifa kutya omihoko odo adja nokutumbula odo da tulwa koshi yombelewa yomupedu presidente, notadi yambididwa okudilila koshi yombelewa yaye. 

“Okudja ashike Juni fiyo Auguste odula ya dja ko epangelo ola dula okushangifa ovanhu vomuhoko wovatilyane ve fike po22 426, va dule okumona omaufemba voo va dule yo okukala tava mono omakwafo va manguluka,” ta ti. 

Ngeenge tashi ya pouhaku, //Khumub okwa ti epangelo ole li pyakidila yo okutunga oukilinika momikunda opo li dule okueta omauhaku popepi novakalimo ava. 

Okwa twikila kutya epangelo natango ohali kendabala yo keshe omwedi opo li tume oupangelo vopokafimbo kovakalimo vomuhoko ou unene ava veli keefuka nomokuti meefaalama. 

Omuhoko ou natango owa pewa yo omhito yoku lihonga meefikola keshe depangelo. 

“Paife otuna nokuli ovo va kendabala okulihonga ndele tava i fiyo okoiputudilo oko kwa dja ovahongi oshoyo ovapangi tava kwafa moikondo ya yooloka,” ta ti. 

Ashike nande ongaho, Omupedu Minista okwa yandja ekemo laye kovakwashiwana ava molwa elongifo nai lavo loingangamifi olo la etifa vahapu vomuvo va kale ashike vena omukifi wo TB ihau veluka vali. 

Ashike nande ongaho, okwa ti epangelo otali kendabala alushe li vatule pondodo ili nawa, opo ashike tava dulu okuya komesho. 

Taimihaihambo2000@gmail. com