Auleria Wakudumo 

Minista wehongo, omaungomba, omaudano novanysha Sanet Steenkamp okwa holola kutya eefikola odo di wete ina di valulwa nawa moshimaliwa shokoushai otadi dulu okutula mo eindilo opo di valululwe. 

Eshi minista okwe shi holola sha landula omakemo ovahongi keembinga neembinga doshilongo molwa oshimaliwa shokoushai osho sha talululwa. Oshimaliwa eshi shimwe osha kufwa ko filufilu nashimwe osha shuna pedu omanga eefikola dimwe inadi kumwa koshinima eshi. 

“Oshimaliwa eshi osha nhuninwa ashike onghalo yokoushai yovahongi ovo ve li hanga keefikola odo. Okatendo kovanailonga oka holola kutya onghalo yofikola keshe ohai talululwa konima yeedula nhano alushe,” Minista ta holola ngaho. 

Nonande eefikola hadi talululwa konima yeedula nhano, minista okwa ti epangelo ola talulula onghalo yeefikola dokoushai lwaxuuninwa mo2015. 

Okwa ti elalakano lokutalulula onghalo yeefikola konima yeedula nhano okukwashilipaleka oufikepamwe nokutala odo da mona elunduluko moule weedula nhano. 

Eshi ohashi kwafa ouministeli opo u tokole ngeenge ofikola otai twikile okupewa oshimaliwa shoukoushai, tashi tukulwa ile otashi kufwa ko sheli kolelela kexumokomesho olo la ningwa oule weedula nhano. 

Exumokomesho ongaashi eepate, olusheno, omeva, oukilinika noipangelo, eefitola naikwao ya wedwa po. 

Meenghundaf ana naKundana , Steenkamp okwa holola kutya ombelewa yomuprima oyo ina oshinakuwanifwa shoku tala omaxumokomesho peefikola nokuninga omalunduluko. 

Eshi a pulwa kutya ova longifa omukalo uli pi okutokola exumokomesho eli, minista okwa ti ova longifa wa faafana moitukulwa 14 yoshilongo. 

Nande ongaho, ovahongi vamwe ova holola eudo nai lavo eshi oshimaliwa shokoushai sha lunduluka. 

Ovahongi moshikandjohongo shaNdobe moshitukulwa shaHangwena ova holola kutya ova kumwa koshikumungu eshi. 

Ovahongi vahapu ova kufa omhito ei oku ya komalungula oko va holola omaliudo avo kombinga yoshimaliwa eshi. 

Ovahongi okudja kofikola Ohahati Primary School moshikandjohongo Onkumbula moshitukulwa shaShikoto ova shiivifila Kundana kutya oshimaliwa shavo shokoushai osha tetwa kepangelo. 

“Otwa li twa kumwa neenghono mokumona oshimaliwa shetu sha kufwa. Otwe shi mona ashike nale eshi twa peya,” tava holola ngaho. 

Ohahati Primary School oili oushiinda neefikola dimwe ngaashi Eengodi Primary osho yo Oshima Primary ashike ina di kufwa ile di tetwe oshimaliwa shokoushai. 

Ovahongi ova holola kutya ove udite epangelo inali longifa oushili okuteta oshimaliwa shavo shoukoushai shaashi natango ofikola oyili monghuwo ina onghambe. 

Ofikola kaina omeva nomboola yomeva yomomukunda oyo ngeno ilipo ihai longifwa shaashi oina omeva oshimongwa,  Onghene ovahongi ohava teke omeva momufima. Ina ku tungwa okapate fiyo opaife nokapangelo kanini oko keli pomudingonoko okeli momukunda Olukupa pena eekilometa 11. Ovahongwa vondodo onhihamano noninhe ohava longelwa natango momatwali. 

Ovahongi ove wete yo va patelwa kondje ngeenge tashi ya kokuninga omatokolo mouministeli. 

Minista wehongo okwa dimina kutya ekwatafano pokati kouministeli novanailonga ngeno ola ninga oshinima shipu. 

Minista okwa yelifa kutya oshimaliwa sha nhuninwa onghalo yokoushai kashifi shaalushe na inashi pumbwa okutalwako ngaho. 

Steenkamp okwa kwashilipaleka kutya eefikola odo inadi valulwa nawa otadi dulu okutula mo eindilo opo di talululwe. 

Oshimaliwa shokoushai osha nhuninwa ovahongi ovo hava longo keefikola dili momikunda nomeefuka. Ovahongi ava, kave na omayakulo eli popepi ngaashi oukilinika ile oipangelo, eedoolopa, vamwe kave na omeva ile olusheno naikwao ya wedwa po. Oshimaliwa eshi ohashi pewa yo ovahongi molwaashi tava dulu okumonena ko oshiponga. 

-awakudumo@nepc.com.na