RUNDU- ndango zodoropa zaRundu kazigeve mbudi asiu nosure mbali vahepa kudipata, Jafet Haiyambo senior primary school ntani Hompa Sofia Mundjebwe Kanyetu junior PS, morwa nosure edi kuruganesa notoilet dimwe tupu nye ngesi kuna kara asi kapi dina kurugana hena. ‘’ Vakansela yipo nye kavatokwere asi vahepa nosure edi kudipata dogoro mukaro ogu vaguwapukurure.
Awo kavatente asi sure zaJafet Haiyambo ntani Hompa Sophia vahepa kudipata dogoro nonzugo dokulivaterera vana diwapayike, ntani evango likare hena asi lina wapa mokuliruganesa,’’ yimo ana kutanta mukurona godoropa pamberewa Olavi Nathael apa nye katupulireko. Kutunda tupu mwaMurongagona 23, nosure edi mbali kutuma vanona vado vatengure kembo po 10h00, nye ndango zodoropa moune yipo nye kavatokwere asi vahepa kuzipata dogoro udigu wangesi vana ugusapo. Nathael katente asi awo vana tupu vadivi younkurungu vakarugane makona kono asi morwa sinke kwakerera asi mema kapi aga piti unene moomu yawapera, ponosure, ano komambo gakara pepi nosure ozo kugwana mema nawa nawa. Ose tuna vapeko magano gamwe asi yinke navavhura kurugana apa tuna kupata nosure edi.
Mokugusapo nye udigu wounene ou, ndango kazitokwere asi pana pumbwa ewapukururo, nayinye oyo yazonauka ndi yakurupa vahepa kuyigusapo, yipo tukeverere mukisi ogu gokukagura. ‘’ Nonkambadaro dokuwapukurura omu aga piti mema gomadona vahepa nako kutarako yipo asi yaharetera vanona mukisi ntani varugani.
Ministeli zahepa kutara asi vanona novarugani vagwane evango lyokulivaterera lina wapa noyiruganeso yoyiwa. Omu navapopera untu wawo ntani eparu lyawo.
Vakansela kavatentye asi pwahepa kukara ekeverero neturo mosirugana yininke nayinye eyi vana tambura. Magano getu aga tuna gava vahepa kugatura moyirugana ntani yahepa kukara pangenderera. Ose twahepa kuyatarako hena asi tayizi moyirugana ndi ngapi, ntani tavayisikisamo. Apa nye yina kara ngesi, kapi yina zere nawa nawa, asi erongo siruwo musinke nayi tameka hena.
Apa nye sayitunga zaNew Era kazigwanekerere nomukurona gerongo momukunda, Christine Shilima momandaha, age katente asi vanona ngesi tavakara tanko komambo dogoro udigu wangesi vana ugusapo. ‘’ pwa nayina, ruha royirugana, kapi vana mana asimpe eyi vana kurugana nonzugo dokulivaterera, makura ose kapi natupulisira vanona vaze kosure nsene asi kapi vana mana kurugana nayinye.
Apa nye navamana nosirugana, hawe ose opo natutanta nye asi yinke yina kukwamako,’’ yimo ana kutanta ngoso momandaha. -jmuyamba@nepc.com.na